Палестинското движење Хамас во понеделникот објави дека Израел го убил нивниот командант Фатех Шариф во воздушен напад врз неговата куќа во бегалскиот камп Ел-Бус, во јужен Либан.
Шариф, неговата сопруга Умаја Ибрахим Абдел Хамид, синот Амин и ќерката Вафа беа убиени во воздушен напад во понеделникот наутро, се вели во соопштението.
Претходно, официјалната либанска национална новинска агенција (ННА) објави дека израелски авиони првпат го нападнале кампот Ел-Бус во близина на градот Тир.
Од почетокот на израелската војна во Појасот Газа и последователните судири со Хезболах, израелската војска уби неколку претставници и борци на Хамас во Либан, вклучително и членови на неговото воено крило, бригадите Ал Касам.
Во јануари, во Либан беше убиен заменик-шефот на политичкото биро на Хамас, Салех ал-Ароури, а во јули беше убиен лидерот на Хезболах, Фуад Шукр.
На 23 септември Израел го започна најинтензивниот напад врз Либан од почетокот на судирите со Хезболах пред речиси една година.
Во нападите на Либан загинале најмалку 916 лица, меѓу кои жени и деца, а 2.709 биле повредени, соопштија либанските власти.
Стравувањата од поширока регионална војна се засилија по израелското убиство на неколку лидери на Хезболах, особено на генералниот секретар Хасан Насрала.
Насрала беше убиен во воздушен напад во петокот вечерта, за време на кој Израел наводно фрлил 85 тони бомби врз цел во населбата Харет Хреик, упориште на Хезболах во јужен Бејрут.
