Целата влада на Јужна Кореја во средата понуди оставка по неуспешниот обид на претседателот Јун Сук Јеол да воведе вонредна состојба во земјата, објавија локалните медиуми.
Како што пренесува телевизијата КБС, владата понудила оставка откако високото претседателство колективно поднело оставка.
Министерот за одбрана Јонг-Хјун Ким рече дека ја поднел својата оставка до претседателот, преземајќи ја „одговорноста за сите прашања поврзани со вонредната состојба“.
„Како министер за национална одбрана, чувствувам одговорност и се извинувам што предизвикав забуна и загриженост во јавноста во врска со вонредната состојба“, изјави Јонг во средата за вестите на Јонхап.
Се вели дека тој директно му предложил на Јун да прогласи вонредна состојба.
„Вонредната состојба е укината и луѓето се враќаат во секојдневниот живот, но внатрешно-политичката и безбедносната ситуација не е лесна. Министерството за национална одбрана ја сфаќа оваа ситуација многу сериозно и ќе вложи максимални напори за решавање на итните прашања на стабилен начин, истовремено обезбедувајќи да нема пречки во операциите на националната одбрана“, рече тој.
Тој додаде дека војската на Јужна Кореја ќе одржи „цврста“ воена подготвеност за поддршка на националната одбрана и безбедноста на луѓето и дека ќе биде повеќе „посветена на првичната мисија доделена на војската“.
Оставките уследија по невиденото прогласување на вонредна состојба, што беше брзо поништено од парламентот, создавајќи значителни политички турбуленции во Јужна Кореја.
Демонстрантите се собраа пред зградата на јужнокорејскиот парламент во Сеул барајќи оставка од јужнокорејскиот претседател.
На воениот и полицискиот персонал целосно им е забранет влез во зградата на парламентот.
„Секретаријатот на Националното собрание воведе целосна забрана за влез во зградата на Националното собрание на персоналот од Министерството за национална одбрана, војската и гардата на Националното собрание, вклучително и полицајците, кои нелегално влегле во просториите“, рече Ким Мин Ки, генерален секретар на Националното собрание на Јужна Кореја.
Забраната следи по синоќешниот упад на околу 280 војници во парламентот откако претседателот Јун прогласи вонредна состојба. Мнозинството пратеници ја отфрлија одлуката, која го принуди претседателот и неговиот кабинет да ја укинат вонредната состојба во рок од шест часа.
Шест опозициски партии во средата поднесоа предлог-закон до Националното собрание за отповикување на Јун. Опозицијата очекува дека гласањето за импичмент на Јун би можело да се одржи веќе во петок или сабота.
Претходно, главната опозициска Демократска партија соопшти дека ќе подигне обвиненија за предавство против Јун, како и неговите министри за одбрана и внатрешни работи и ќе ги отповика.
Демократската партија има мнозинство во парламентот со 170 места во 300-членото Национално собрание.
Сепак, за смена на актуелниот претседател им се потребни 22 гласа од помалите опозициски партии и осум од владејачката Партија на Народната моќ.
Ако Јун биде отповикан, тој ќе биде суспендиран од функцијата додека Уставниот суд не одлучи дали да го врати или да го отстрани од функцијата.
Претседателот Јун прогласи вонредна состојба во телевизиско обраќање, велејќи дека е неопходно „да се заштити земјата од комунистичките сили на Северна Кореја и да се елиминираат антидржавните актери“.
Според него, вонредната состојба е прогласена поради вклученоста на опозицијата во „антидржавни активности“.
