Националното собрание на Јужна Кореја гласаше за импичмент на вршителот на должноста претседател на земјата, Хан Дук-су.
Собранието го изгласа предлогот за импичмент со 192 гласа „за“ и ниту еден против, пренесува „Јонхап“.
Членовите на владејачката партија го бојкотираа гласањето.
Главната јужнокорејска опозициска партија, Демократската партија (ДП), на вчерашната пленарна седница на парламентот поднесе барање за импичмент на вршителот на должноста претседател на земјата.
Хан е првиот в.д.претседател кој беше отповикан од јужнокорејското собрание. Тој беше премиер на Јужна Кореја кога ја презеде функцијата по импичментот на претседателот Џун Сук јеол на 14 декември, кој беше суспендиран поради краткорочно воведување вонредна состојба на почетокот на овој месец.
Јужнокорејското обвинителство, пак, утринава објави дека подигнало обвинение против поранешниот јужнокорејски министер за одбрана Ким Џонг-хјун, кој е притворен под обвинение за бунт поради неговата улога во прогласувањето воена состојба на 3 декември, која траеше неколку часа.
Во соопштението за печатот се наведува дека специјалниот истражен тим на обвинителството поднел обвинение против Ким под обвинение за злоупотреба на власта и улога во бунтот, објави Јонхап.
Агенцијата наведува дека ова е прво обвинение во врска со прогласувањето на воена состојба на 3 декември.
Обвинителите веруваат дека Ким препорачал сега отповикуваниот јужнокорејски претседател Џун Сук-јеол да прогласи воена состојба и дека тој го насочил распоредувањето на војници во Националното собрание и Канцеларијата на Националната изборна комисија за време на воената состојба.
