Бројот на загинати во вчерашниот двоен бомбашки напад во градот Керман во југоисточен Иран е ревидиран на 84, а 284 лица се повредени, соопштија властите рано утрово.
Во изјава за медиумите за време на посетата на Керман, министерот за внатрешни работи Ахмад Вахиди рече дека врз основа на форензичката проценка, досега се прогласени за мртви вкупно 84 лица.
„Многу од повредените сè уште се во критична состојба“, додаде Вахиди, што би можело да го зголеми бројот на загинати.
„Вкупно 220 повредени се примени во различни болници во планинската провинција“, информира министерот, додавајќи дека состојбата е нормализирана.
Најмалку две силни експлозии одекнаа вчера во градот Керман, во непосредна близина на гробиштата каде што е погребан поранешниот висок воен командант, генерал Касем Сулејмани.
Илјадници луѓе се собраа таму за да ја одбележат четвртата годишнина од смртта на Сулејмани, поранешниот началник на Силите Кудс од Корпусот на Исламската револуционерна гарда, кој беше убиен во напад со американско беспилотно летало во Багдад во јануари 2020 година.
Безбедносните агенции сè уште ги истражуваат причините за експлозиите. Ниту една група досега не ја презеде одговорноста за нападите, кои се најсмртоносните во историјата на Иран по 1979 година.
Вчера, официјалните претставници соопштија дека бројот на загинати е 103, а бројот на повредени 140.
Шефот на Организацијата за итни медицински ситуации во Керман, Саид Мухамад Сабери, за државната телевизија денес го потврди ревидирањето на бројот на загинати од 103 на 84.
Тој рече дека многу тела биле непрепознатливи поради силните бомбашки напади, што довело до неточности во пребројувањето на жртвите, што подоцна е ревидирано од форензичарите.
Говорејќи на настанот во Техеран вчера, претседателот Ебрахим Раиси изјави дека сторителите на „кукавичкиот чин“ „наскоро ќе бидат идентификувани и казнети“ од страна на безбедносните агенции во земјата.
Тој, исто така, ги нападна САД и Израел за нивните „злосторства“ и порача дека тие „ќе ја платат цената“, без директно да ги обвини.
