Најмалку тројца Палестинци загинаа денес во израелски воздушен напад врз бегалскиот камп Џенин на окупираниот Западен Брег.
Палестинската новинска агенција Вафа јавува дека во израелскиот воздушен напад се повредени девет лица, а двајца од нив се во критична состојба.
Над 80 израелски воени возила, вклучително и булдожери, влегоа во градот Џенин, а израелските сили упаднаа во домовите на Палестинците и приведоа неколкумина Палестинци.
Израелската армија се судри со Палестинците, а најмалку двајца Палестинци се повредени.
Вафа објави дека израелските воени булдожери уништиле голем дел од инфраструктурата во кампот, вклучително и улиците.
Тензиите низ Западниот Брег се зголемија со нападите на израелската војска врз Појасот Газа по прекуграничниот напад на Хамас на 7 октомври.
Според податоците на палестинското Министерство за здравство, од израелски оган на окупираната територија од 7 октомври досега загинаа повеќе од 200 Палестинци, а над 2.700 се ранети.
Израелската војска приведе повеќе од 2.730 лица на Западниот Брег во истиот период, според податоците објавени од групите за правата на затворениците.
