Украинскиот претседател Володимир Зеленски изрази подготвеност да се сретне со рускиот претседател Владимир Путин за да разговараат за политичките и дипломатските начини за ставање крај на војната.
Говорејќи на прес-конференција во Киев, вчера по состанокот со претседателот на Европската банка за обнова и развој (ЕБОР), Одил Рено-Басо, Зеленски го обвини Путин дека „се плаши да разговара“ со него за завршување на војната.
„Американскиот претседател Доналд Трамп и земјите од Европската унија веруваат дека дипломатијата е невозможна без Русија, без Путин. Затоа реков дека сум подготвен ако можеме да се договориме како ќе заврши оваа војна. Подготвени сме за дипломатија, тука немам проблем со тоа. Проблемот е што ми се чини дека Путин во основа се плаши да разговара со мене“, рече Зеленски.
Во врска со украинскиот декрет за забрана на какви било мировни преговори со Русија додека Путин е нејзин претседател, кој Зеленски го потпиша во 2022 година, украинскиот лидер тврди дека тоа не се однесува лично на него.
Тој ги коментираше извештаите во медиумите за американскиот план за ставање крај на војната во Украина.
„Сигурен сум дека нашите тимови ќе работат заедно. Не може да има друг план“, рече Зеленски.
Тој нагласи дека Киев размислува за официјални контакти со Вашингтон, вклучително и мировен план.
Осврнувајќи се на средбата со Рено Бас, Зеленски рече дека разговарале за финансиската помош на Европската унија за Украина.
Претседателот на ЕБОР рече дека банката ѝ обезбедила на Украина финансиска помош во вредност од 6,2 милијарди евра од 2022 година и планира да продолжи да инвестира во енергијата и во приватниот сектор.
