Музејот „Ephesus Experience“ (Доживување на Ефес) во Туркије, лоциран во античкиот град Ефес, ја освои титулата најдобар музеј на престижните награди Mondo-Dr, една од најпрестижните во областа на технологијата, дизајнот и изложбата.
Наградите Mondo-Dr беа покренати за да се оддадат признанија за најдобрите инсталации ширум светот. Со текот на времето, наградите почнаа да ги слават најдобрите проекти и достигнувања во секторот за изложби и угостителство, со посебен фокус на дизајнот на просторот, искуството на посетителите и техничките инсталации. Седмото издание на наградите Mondo-Dr се одржа на 12 јуни годинава во Лас Вегас. Музејот „Ephesus Experience“ е прогласен за најдобар музеј благодарение на оценката на независно жири.
Музејот „Ephesus Experience“ ги поканува посетителите на незаборавно патување низ улиците на Ефес каде што ќе научат повеќе за животот во античките времиња и ќе ги откријат тајните на античкиот свет. Тој е еден од првите музеи во светот кој комбинира историско раскажување приказни со напредна технологија за да создаде уникатно и привлечно искуство. Тоа им овозможува на посетителите да го искусат секојдневниот живот, трговијата, архитектурата и уметноста на древниот Ефес преку извонредни технологии кои ги потопуваат во богато аудио-визуелно искуство, оживувајќи ги приказните што ги презентираат.
Зад овој проект стои DEM Museums, кои собраа разновиден тим од архитекти, куратори, дизајнери, уметници, технолошки експерти, историчари и археолози од водечки компании и академски институции во Туркије и од целиот свет.
Ефес секоја година привлекува илјадници локални и странски туристи и е една од најинтересните дестинации на турскиот брег на Егејското Море. Тој беше еден од најголемите пристанишни градови во своето време и од 2015 година е на листата на светско наследство на УНЕСКО.
Ефес постои уште од неолитската ера, но ја доживеал својата вистинска слава под Римската империја како главен град на Мала Азија. Како втор најважен град на Римската империја, Ефес растел и напредувал. Неговите жители биле главно образовани и богати, а зградите биле богато украсени, што ги одразувало интересите и благосостојбата на нивните жители. Ефес е еден од најдобро зачуваните антички градови во медитеранскиот регион и дом на храмот на Артемида, едно од седумте чуда на античкиот свет.
