Петтина од испитаниците во Хрватска инвестираат или инвестирале во криптовалути, првенствено со цел да воспостават долгорочни инвестиции, како и брза и лесна заработка, покажува истражувањето „МастерИндекс“ спроведено од агенцијата „Импрув“ за компанијата „Мастеркард“ во април годинава.
Пречките за инвестирање во криптовалути како што се наведува во истражувањето, се недостигот на информации за криптовалутите, високиот ризик од овој вид инвестиции и недостигот на средства.
Истражувањето покажа дека една петтина од испитаниците имаат искуство со инвестирање во криптовалути, девет отсто од нив моментално инвестираат во криптовалути, 11 отсто инвестирале претходно, додека 18 отсто планираат да инвестираат во иднина.
Меѓу оние кои моментално инвестираат во криптовалути почесто се застапени мажите отколку жените, како и тие со повисоки лични примања.
Покрај долгорочните инвестиции и заштеди за пензионирање (43 отсто) и брзата заработка (34 отсто), хрватските граѓани инвестираат во криптовалути за забава и за диверзификација на своето инвестициско портфолио (32 отсто), покажа истражувањето.
За 55 отсто од испитаниците, недоволното познавање на криптовалутите е главната причина да не инвестираат. По нив превисокиот ризик (36 отсто) и недостигот на средства (31 отсто) се меѓу главните причини зошто не инвестираат во криптовалути.
Меѓу оние кои не се заинтересирани за дигитални или криптовалути, се издвојуваат испитаниците со најмал личен приход и тие од областа Славонија.
Една петтина од испитаниците не инвестираат во криптовалути бидејќи моментално не се заинтересирани за тој тип на инвестиции, додека само 13 отсто од испитаниците се загрижени за флуктуацијата на цените на криптовалутите.
Оние кои не инвестираат во криптовалути затоа што не веруваат дека таквите инвестиции се соодветно регулирани се 14 проценти, додека испитаниците со повисоки лични примања често сметаат дека другите форми на инвестирање се попривлечни.
Во моментот на истражувањето, 52 отсто од испитаниците кои инвестираат во криптовалути рекле дека вредноста на нивните криптовалути е зголемена, а 41 отсто рекле дека се намалиле во споредба со вредноста при купувањето.
Според истражувањето, во следните 12 месеци, 77 отсто од испитаниците планираат да купат повеќе од криптовалутите што веќе ги поседуваат, а 74 отсто од нив планираат да купат други видови криптовалути.
37 проценти од испитаниците планираат да продадат дел од своите валути, 13 проценти од нив планираат да ги продадат сите, додека шест проценти од сопствениците на криптовалути не ја следат вредноста на нивните крипто средства.
Испитаниците кои живеат во Истра и регионот Приморје изразуваат поголем интерес за купување криптовалути.
„Криптовалутите едвај беа видливи на економскиот радар до пред десетина години, а денес се чини дека се секаде присутни, создавајќи нови можности, но и поставувајќи сложени предизвици“, рече директорот на „Мастеркард“ за Хрватска и Романија Космин Владимиреску, наведувајќи дека за помалку од 15 години, криптовалутите прераснаа од главно шпекулативно средство за инвестирање во глобален финансиски феномен.
Според неодамнешниот извештај за криптовалути, бројот на корисници на криптовалути пораснал за 178 отсто во 2021 година, на 295 милиони корисници ширум светот - а тој број се очекува да достигне една милијарда до крајот на 2022 година, истакна Владимиреску.
Овие бројки, рече тој, зборуваат сами за себе, но колку што воведувањето криптовалути поттикнува иновации, исто така создаде значителни предизвици за регулаторите кои ги бараат најдобрите начини за заштита на потрошувачите и инвеститорите.
Онлајн анкетата „МастерИндекс“ е спроведена на примерок од 1.010 корисници на банкарски услуги во Хрватска на возраст од 18 до 55 години.
