Новиот извршен директор на Твитер, Илон Маск, изјави дека мисијата на платформата за социјални медиуми е да стане најточниот извор на информации во светот, предизвикувајќи дебата за тоа како ќе го постигне тоа и кој одредува што е точно, а што не.
Низата драстични мерки, вклучително и отпуштање на половина од персоналот и воведување наплата на корисници, што Маск ги спроведе откако го презеде Твитер во договор вреден 44 милијарди долари пред само една недела, обезбеди некои рани индиции за тоа како платформата ќе биде преобликувана од најбогатиот човек на светот.
Некои компании ги намалија трошоците за рекламирање откако беше објавен договорот, при што Маск ги обвини активистичките групи за притисок врз огласувачите.
„Твитер треба да стане убедливо најточниот извор на информации за светот. Тоа е нашата мисија“, рече Маск во неделата.
Неговиот твит веднаш предизвика десетици илјади одговори и предизвика дебати за тоа како ќе се постигне мисијата.
„Точно, за кого?“, праша основачот и поранешен извршен директор на Твитер Џек Дорси.
Маск, кој исто така ја води компанијата за електрични возила Тесла и ракетната компанија Спејк Екс, минатиот месец рече дека Твитер ќе формира совет за модерација на содржината со „широко различни гледишта“.
Самонаречениот апсолутист на слободата на говорот тогаш рече дека нема да има големи одлуки за содржината или враќање на суспендирани сметки пред да се состане тој совет.
Суспендирање профили
Маск, исто така, во неделата рече дека корисниците на Твитер кои се занимаваат со имитирање без јасно да го наведат тоа како „пародија“ ќе бидат трајно суспендирани без предупредување. Тој рече дека Твитер претходно издавал предупредување пред суспензијата, но бидејќи Твитер спроведува широка верификација, нема да има предупредување, како и „нема да има исклучоци“.
Маск исто така најави дека секоја промена на името ќе предизвика привремено губење на сината ознака за проверка што потврдува дека профилот е автентичен.
Овој потег доаѓа откако платформата, наводно, ги суспендираше корисниците кои ги сменија своите кориснички имиња во Илон Маск, вклучувајќи ја американската комичарка Кети Грифин и актерот Рич Сомер.
Твитер во саботата ја ажурираше својата апликација во App Store на Apple за да започне со наплата од 8 долари за сината ознака со која се означуваат верификуваните профили.
Придобивките од услугата за верификација ќе вклучуваат помалку реклами, можност за објавување подолги видеа на Твитер и приоритетно рангирање за квалитетна содржина, соопшти Твитер.
Но, во неделата, Њујорк Тајмс објави дека Твитер го одложува објавувањето на ознаките за проверка на претплатниците на неговата нова услуга до среднорочните избори во вторник.
Да се вратат назад дел од отпуштените
По големиот бран отпуштања, Твитер сега бара десетици вработени кои останале без работа да се вратат.
Некои од оние од кои се бара да се вратат беа отпуштени по грешка. Други беа отпуштени пред раководството да сфати дека нивната работа и искуство можеби се неопходни за да се изградат новите функции што ги замислува Маск, се вели во извештајот, цитирајќи луѓе запознаени со потезите.
