Швајцарските научници развиваат метод за „лемење“ на раните наместо да ги шијат, бидејќи тоа може да помогне да се спречат опасни по живот компликации предизвикани од истекување на шавовите.
Истражувачки тим од Швајцарската федерална лабораторија за наука и технологија за материјали (Емпа) и Федералниот институт за технологија ETH Цирих сега аплицираше за патент за овој процес.
Во принцип, „лемењето“ на рани со новиот метод функционира на ист начин како и лемењето на два метали: потребен е лем што се топи на ниска температура и може да се користи за спојување на двата дела, објави Свисинфо.
Во случај на метали, обично се користи мешавина на метали со бакар. Во случај на заздравување на раните, истражувачите развија протеинска желатинска паста која служи како лепак.
Пастата содржи два вида наночестички: таканаречените наночестички на титаниум нитрид, кои ја претвораат светлината во топлина кога пастата е зрачена со ласер и таа се загрева.
Друг вид наночестички се честичките бизмут ванадат, кои делуваат како еден вид термометар, велат од Емпа, наведувајќи дека овие честички испуштаат светлина со одредена бранова должина во зависност од температурата и на тој начин овозможуваат прецизна контрола на температурата во реално време.
Во лабораториските тестови со различни примероци на ткиво на органи, како што се, на пример, панкреасот или црниот дроб, истражувачите постигнаа брзо, стабилно заздравување на раните.
Тестовите беа успешни и на ткивата на уретрата, јајцеводите и цревата, изјавија од Емпа.
Резултатите од истражувањето се објавени во списанието Small Methods.
