На плажа во Јемен, морска желка се качува на брегот за да снесе јајца, од кои најверојатно ќе се родат женки поради зголемените температури кои создаваат родова нерамнотежа, која носи закана од локално изумирање.
Со песокот што е потопол поради продлабочената климатска криза, јајцата ретко даваат машки желки, кои бараат пониски температури за време на периодот на инкубација.
Студиите во неколку крајбрежни региони на јужен Јемен „покажаа дека има 90 отсто повеќе женски морски желки отколку мажјаци“, рече Џамал Баузир, директор на одделот за биолошка разновидност на Универзитетот во Аден.
Тешката родова нерамнотежа ќе продолжи се додека не доведе до целосно истребување на морските желки во Јемен „во годините што доаѓаат“, рече Баузир.
Активистот за заштита на животната средина Хафиз Келшат рече дека процентот на машки желки „значително се намалил“ во последниве години.
„Повеќето бебиња желки се женски поради промената на температурата“, изјави тој за АФП на плажата за гнездење во провинцијата Махра, во близина на границата со Оман.
Ова е особено случај во лето, кога температурите често достигнуваат 31 степени Целзиусови - точката во која од јајцата на морските желки почнуваат да излегуваат женки.
Половата нерамнотежа се влошува секоја година бидејќи се подолги периодите на екстремни горештини кои го погодуваат Арапскиот Полуостров, еден од најжешките региони во светот.
Проблемот не е единствен само за Јемен, кој речиси една деценија е погоден од разорната граѓанска војна која ја создаде една од најлошите хуманитарни трагедии во светот.
Од американската сојузна држава Флорида до Големиот корален гребен во Австралија, бројот на машките морски желки се намалува поради климатската криза.
Во 2018 година, американските истражувачи открија дека зголемувањето на температурите значи дека повеќето од 200.000 зелени желки во северниот дел на Големиот корален гребен се женски, што ја зголемува заканата од истребување.
Зафатени со војна
Јемен, сместен меѓу Црвеното Море и Индискиот Океан, може да се пофали со богата разновидност на природни живеалишта и видови, од кои многу од нив не се наоѓаат никаде на друго место во светот.
Но неговата генетска разновидност и потенцијалот за иден развој на туризмот што го претставува, се повеќе се загрозени од глобалното затоплување.
Јемен е рангиран како една од климатски најранливите земји во регионот, според Иницијативата за глобална адаптација на Универзитетот Нотр Дам во американската сојузна држава Индијана.
Екстремните горештини и зголемената варијабилност на врнежите што доведуваат до суша и поројни поплави се меѓу предизвиците што се предвидуваат за најсиромашната земја на Арапскиот Полуостров.
Баузир рече дека за да се справат со продлабочувањето на родовата нерамнотежа, властите треба да создадат „специјализиран технички тим за следење на желките во нивните места за гнездење и да ги сместат јајцата во соодветни инкубатори“ за да создадат машки потомци.
Обезбедувањето штитови за сонце на плажите, исто така, може да помогне да се намалат температурите на песокот и да се зголеми бројот на машки младенчиња.
Но зачувувањето на животната средина неизбежно го зазеде второто место во однос на мачната граѓанска војна, која уби стотици илјади луѓе и ја остави инфраструктурата на земјата во распад.
„Се разбира, сегашните околности го отежнуваат извршувањето на заштитните операции“, рече Баузир.
Официјален претставник на Министерството за животна средина призна дека напорите за зачувување пропаднале за време на војната со бунтовниците Хути, сојузници на Иран.
„Властите работеа на различни планови, вклучително и создавање на неколку резервати“, рече Наиф Али бин Масаад.
Но тие се „зафатени со војната против Хутите и терористичките групи... така што не ги преземаат своите одговорности“ за заштита на животната средина, рече претставникот.
