Дритан Абазовиќ, кој до неодамна беше премиер на Црна Гора тврди дека неговиот кабинет не паднал во август лани поради Основниот договор што го потпишал со Српската православна црква, туку поради „бескомпромисната борба против криминалот“.
Тој исто така тврди дека таа влада не била формирана со поддршка на Демократската партија на социјалистите (ДПС), туку, како што вели, со гласови на претставници во државниот парламент.
Абазовиќ во емисијата „Наглас“ рече дека доказите за криминалните активности во Црна Гора се на безбедно, а на потег се институциите одговорни за борба против криминалот и корупцијата.
Тој рече и дека неговата влада го оставила зад себе чувството на слободно размислување и дека никој не е недопирлив, туку сите се еднакви пред законот.
Тој верува дека Црна Гора никогаш не видела таков вид на демократски напредок што го виделе за време на неговата влада.
„Сè може да се случи, цивилизирано, достоинствено, културно, имаме и ново свикување на парламентот“, изјави Абазовиќ.
Тој е убеден дека неговата Влада имала такви резултати што новоформираната, како што наведува, нема да може да ги надмине и достигне.
„Нема мафија која не е нападната. Ги таргетирав сите, со вакво обвинителство и судство, веројатно ќе потрае некое време“, рече Аазовиќ, кој сега е лидер на опозициското Граѓанско движење Ура.
Напоменува дека седмиот судија на Уставниот суд може да се избере веќе утре, но дека, како што вели, има луѓе во политичкиот живот кои не се радуваат на победите на сопствената држава.
Тој смета дека неговата влада не се борела против лажните вести и дека, како што вели, нема намера да се расправа со Центарот за граѓанско образование.
„Не го напаѓам невладиниот сектор, туку само невистините. Веста за именувањето на над 1.300 функционери во мандатот на техничката влада е неточна“, изјави Абазовиќ.
Поранешниот премиер тврди дека судството во Црна Гора е најлошата власт и дека судството мора да се реформира.
„Со целосна политичка поддршка, доволен е половина мандат за да се решат главните прашања од борбата против организираниот криминал и корупцијата. Сите ја следат линијата на најмал отпор, никој не сака да го прави ова“, рече Абазовиќ.
Тој рече дека е прашање зошто не се разрешени убиствата на Душко Јовановиќ и Славољуб Шќекиќ.
„Направивме што можевме, тоа е во Вишото обвинителство“, рече Абазовиќ.
Тој повтори дека Монстат е подготвен за попис на населението и дека може да ги спроведе сите акции.
„Ќе видиме што не чека до крајот на годината. Нè чека задолжување. Но не за инфраструктурни проекти, туку за потрошувачка“, рече Абазовиќ и повтори дека долгот може да достигне и до една милијарда евра и дека „очигледно е планиран процент“.
