Босна и Херцеговина може да смета на силната поддршка од пријателска Туркије во наредниот период, рече Сабри Демир, главен советник на турскиот претседател Реџеп Таип Ердоган за Балканот по денешната средба со членот на Претседателството на БИХ Денис Бечировиќ.
Тие разговараа за актуелната состојба во Босна и Херцеговина, регионот, како и за зајакнување на односите меѓу БиХ и Туркије.
Демир на Бечировиќ му ги пренел поздравите на турскиот претседател Реџеп Таип Ердоган и неговата порака дека Анкара цврсто ја поддржува независноста, суверенитетот и територијалниот интегритет на БИХ.
Беше истакната важноста од зајакнување на политичките, економските и други врски меѓу Босна и Херцеговина и Туркије.
Членот на Претседателството на БиХ, Денис Бечировиќ, се заблагодари на претседателот Ердоган и на Туркије за континуираната поддршка.
Тој потсети и на пријателскиот разговор со турскиот министер за надворешни работи Хакан Фидан минатата сабота, на кој тој укажа на сериозноста на моменталната ситуација во Босна и Херцеговина, односно на фактот дека раководството на ентитетот Република Српска ги загрозува мирот и безбедноста во Босна и Херцеговина и во регионот.
Соговорниците се согласни дека треба да продолжи интензивниот дијалог меѓу Анкара и Сараево.
