Во Доња Јабланица е пронајдено телото на последната барана жртва од разорните поплави, потврди за Анадолу Агенција, Сабахудин Спаховиќ од Федералната управа за цивилна заштита (ФУЦЗ).
Според него, ова е последната жртва на подрачјето на Доња Јабланица по која се трага и чие исчезнување е пријавено. Тој потврди дека се уште се трага по уште едно лице во месноста Бутуровиќ Поље во општина Коњиќ.
Во поплавите и одроните што ја погодија Босна и Херцеговина пред десет дена загинаа најмалку 26 лица, 19 во областа Јабланица, четворица во Коњиќ и тројца во Фојница.
Храна и лекови се доставуваат до сите делови на општината. Стотици доброволци од Босна и Херцеговина и од странство, со помош на машини, ги расчистуваат патиштата и зградите во областа погодена од поплавите.
„Сè уште се во прекин патните комуникации со одредени населени места на подрачјето на општина Јабланица“, соопштија од ФУЦЗ.
Главните патишта М-17, М-17-5 и М-16-2 ги одржува Дирекцијата за патишта на Федерацијата БиХ со нејзините проектантски и градежни компании.
Снабдување со електрична енергија е воспоставено во сите населени места, со исклучок на еден дел од Доња Јабланица. Продолжи работата на поправка на водоводната и телефонската мрежа.
Состојбата во општините Кисељак, Фојница и Крешево не е променета, а се уште се врши расчистување и санација на теренот.
