Црногорските власти денеска го екстрадираа во САД јужнокорејскиот државјанин Хјеонг До Квон, попознат како „Кралот на криптовалутите“.
До Квон беше баран од САД и Јужна Кореја за измама со криптовалути „тешка“ најмалку 40 милијарди долари, сума на која се проценува дека е причинета на инвеститорите по колапсот од неговите криптовалути Луна и Тера.
До Квон е екстрадиран од аеродромот во Подгорица од службеници на НЦБ Интерпол Подгорица, со поддршка на Специјалната полициска единица, соопшти Полициската управа на Црна Гора.
До Квон беше уапсен во Црна Гора на 23 март минатата година.
„Денеска, 31 декември 2024 година, тој беше предаден на надлежните органи на прогонот на Соединетите Американски Држави и агентите на Федералното биро за истраги (ФБИ), а согласно одлуката на Министерството за правда на Црна Гора, заради водење кривична постапка во САД за повеќе кривични дела“, се наведува во соопштението.
До Квон се бара за сторени повеќе кривични дела измама, продажба на стоки, купување и продажба на хартии од вредност, пренос на меѓудржавни дознаки, кривично дело измама во врска со договор за продажба на стоки и помагање, кривично дело измама во поврзаност со купопродажба на хартии од вредност, како и помагање, кривичното дело електронска измама и помагање, и кривичното дело здружување за извршување измама во врска со договорот за продажба на стоки, потоа купопродажба на хартии од вредност, манипулација со цените на хартиите од вредност и пренос на меѓудржавни дознаки.
Јужна Кореја беше првата што побара екстрадиција на До Квон, но одлуката за негова екстрадиција во САД неодамна ја донесе црногорскиот министер за правда Бојан Божовиќ.
