Проширувањето на Европската унија е на врвот на приоритетите на Европската комисија и Црна Гора, доколку ги исполни условите, може да биде членка на унијата пред 2030 година, изјави претседателката на ЕК, Урсула Фон дер Лајен за време на нејзината официјална посета на Црна Гора.
Претседателката на ЕК беше пречекана со највисоки државни и воени почести од претседателот на Црна Гора, Јаков Милатовиќ.
По средбата, Фон дер Лајен и Милатовиќ испратија оптимистички пораки во однос на перспективата на Црна Гора на патот кон полноправно членство во ЕУ.
„Подолго време Црна Гора е земјата која постигна најголем напредок кон ЕУ и мило ми е што сте решени да ја задржите таа позиција. Мојата прва порака е дека сега треба да бидете фокусирани на задачата за пристапување и заедно мораме да го завршиме тој процес“, истакна Фон дер Лајен.
Таа рече дека втората задача е приближување на економиите на Црна Гора и ЕУ.
„Црна Гора има потенцијал да стане главен снабдувач на електрична енергија во овој регион“, рече претседателката на ЕК.
На прашањето колку е реално Црна Гора да стане членка на ЕУ и пред 2030 година, Фон дер Лајен истакнува дека нема потреба да се чека.
„Црна Гора е лидер, ја има последната милја пред да ја помине, треба да се истурка. Доколку исполнувате одредени услови, нема да бидеме обврзани со датуми. Нема календар на пристапниот процес, туку спроведување на реформите и напредокот кон ЕУ е важно. Ја охрабрувам Црна Гора да ја помине последната милја што е можно побрзо и тука ќе се отвори вратата“, рече Фон дер Лајен.
Милатовиќ смета дека Црна Гора е поблиску до Европската Унија од другите кандидати и дека изгледите за полноправно членство на Црна Гора во Европската унија се пред 2030 година.
По средбата со Фон дер Лајен, тој посочи дека Црна Гора практично нема отворени прашања со соседите, е членка на НАТО, напреднала најдалеку во евроинтеграциите и нејзината политика е усогласена со надворешната политика на ЕУ.
„Црна Гора има вистинско европско ориентирано политичко мнозинство. Ниту една друга земја која претендира да биде членка на ЕУ го нема сето тоа“, нагласува Милатовиќ.
Тој рече дека Црна Гора се залага за спроведување на принципот „регата“, според кој ќе се мерат индивидуалните достигнувања на државите во исполнувањето на критериумите за членство во ЕУ.
Милатовиќ изрази разбирање за критичкиот став на ЕУ изразен во минатогодишниот извештај за напредокот и неодамна усвоената резолуција на Европскиот парламент.
„Се надевам дека, во оваа смисла, научивме лекции на национално ниво и дека по долг период на незадоволителна динамика во спроведувањето на потребните реформи, во Црна Гора се постигнати услови за деблокирање на процесот“, рече Милатовиќ.
Тој смета дека најодговорните политички актери - пред се новоформираниот Парламент и Владата - ќе ја препознаат важноста на политичкиот момент кога станува збор за европската перспектива на Црна Гора и дека нивното конструктивно делување ќе овозможи целосна валоризација на потенцијалот генериран од долгоочекуваните политички промени во земјата.
Тој потсетува дека во претходниот турбулентен период, кој се карактеризираше со нестабилност и отежнато функционирање на клучните институции во Црна Гора, фокусот на неговата политичка активност беше консолидација на севкупниот демократски, политички и општествен потенцијал во насока на исполнување на потребните предуслови за постигнување членство во ЕУ како клучна стратешка цел на Црна Гора.
Во рамки на посетата на Црна Гора, за денеска е предвидена и средба на Фон дер Лајен со новоизбраниот премиер Милојко Спајиќ.
По средбата, претседателот на ЕК ќе го посети електропреносниот капацитет во Подгорица, кој е дел од Трансбалканскиот коридор за пренос на електрична енергија, кој е кофинансиран од Европската Унија.
