Кристијан Шмит арогантно и дрско се обидува да покаже дека е над сите - над Уставот, законите, институциите, па дури и над народот, изјави денеска претседателот на Република Српска Милорад Додик за високиот претставник во Босна и Херцеговина, Кристијан Шмит.
Тој денеска во Сараево, ден пред да биде изречена првостепената пресуда на судот на БиХ против него за напочитување на одлука на високиот претставник се огласи на Х.
„Шмит сака да демонстрира дека е султан, гувернер, полубог кој ги контролира судбините, го менува Уставот, законите, изборите и демократијата како што сака“, напиша Додик.
Додик рече дека српскиот народ не е ничиј поданик, дека Република Српска не признава диктати и нема да дозволи затворање на нејзините институции.
„Но ние му порачуваме - ова не е колонија, а српскиот народ не е ничиј поданик. Република Српска не признава диктати и нема да дозволи да се газат нејзините институции. Ќе нè има по тебе, а ти ќе останеш само темна дамка во историјата. Не те признаваме ниту тебе, ниту твоите одлуки, се што кажуваш е глупост“, напиша Додик.
Високиот претставник во Босна и Херцеговина Кристијан Шмит, пак, денеска им порача на граѓаните дека нема преговори за Босна и Херцеговина и дека таа продолжува да напредува на нејзиниот европски пат.
Амбасадорите на Управниот одбор на Советот за спроведување на мирот (ССМ) се состанаа денеска во Сараево за да разговараат за актуелните политички случувања во врска со судската постапка против Додик.
Тој рече дека членовите на Управниот одбор на ССМ уште еднаш ја потврдиле својата недвосмислена посветеност на територијалниот интегритет на целата држава Босна и Херцеговина, која се состои од два ентитети и округот Брчко.
„Би сакал да испратам лична порака до граѓаните на БиХ. Разбирам дека многумина од вас се навистина загрижени за последните случувања. Бидете уверени дека меѓународната заедница останува будна и внимателна. Дејтонскиот поредок и државните институции продолжуваат да се штитат и мора да се почитуваат“, рече Шмит.
Тој исто така рече дека меѓународната заедница останува цврсто посветена на мирот и стабилноста во регионот.
Првостепената пресуда за случајот против Милорад Додик и вршителот на должноста директор на Службен весник на РС, Милош Лукиќ, пред Судот на БиХ е закажана за среда, на 26 февруари.
Обвинителството на БиХ ги товари за сторено кривично дело „неспроведување на одлуките на високиот претставник во БиХ“.
Доколку бидат прогласени за виновни, им се заканува казна затвор до пет години и забрана за политичка активност.
Во Бања Лука за денеска и утре се најавени собири за поддршка на Додик, а опозициските партии не учествуваат.
