Европската Унија (ЕУ) ќе распореди мисија за набљудување на парламентарните избори во Косово, кои ќе се одржат на 9 февруари 2025 година.
Високата претставничка и потпретседателка на Европската комисија, Каја Калас, одлучи да распореди набљудувачка мисија на ЕУ на претстојните парламентарни избори во оваа балканска земја. Таа за главен набљудувач ја назначи Натали Луазо, претставничка на Европскиот парламент.
„Се чувствувам почестена да служам како главен набљудувач на мисијата на ЕУ за набљудување на изборите во Косово во 2025 година. Претстојните парламентарни избори ќе бидат први што ќе се одржат според новиот изборен закон, кој ги имаше предвид нашите претходни препораки. Со нетрпение очекувам да работам со властите, политичките партии, кандидатите, невладините организации и другите изборни чинители во Косово“, изјави денеска Луазо.
Мисиите за набљудување на изборите во Косово, на барање на нивните власти, ќе ја покажат одлучната поддршка на ЕУ за Косово во напорите дополнително да се зајакне демократското владеење, соопштија од ЕУ.
Последните парламентарни избори на Косово се одржаа на 14 февруари 2021 година, кога Движењето „Самоопределување“ освои повеќе од 50 % од гласовите.
