Европската унија треба да ѝ ги „бакне рацете на Србија“ за соработката што Србија и Унгарија ја покажаа во заштитата на границите на ЕУ, изјави денеска словачкиот премиер Роберт Фицо во Белград.
Тој објасни дека целосно е променет миграцискиот пат, кој се однесува на Србија и Унгарија и бројот на илегални премини.
„Србија навистина ја заслужува помошта на Европската унија во оваа област бидејќи е барана и скапа“, рече Фицо и додаде дека Србија ѝ помогнала и ѝ помага на ЕУ во миграцијата на начин на кој малку други земји можеле.
Фицо е во официјална посета на Србија, при што се сретна со претседателот на Србија, Александар Вучиќ, на што му претходеше свечен пречек пред Палатата Србија.
Одржана е и средба на делегациите на двете земји предводени од Вучиќ и Фицо.
Словачкиот премиер рече дека двете земји можат да се потпрат една на друга.
„Го почитуваме територијалниот интегритет на Србија, а што се однесува до Косово никогаш нема да ве изневериме“, нагласи Фицо.
Тој ѝ честиташе на Србија за одличните резултати во економскиот развој, како и за нејзината политика насочена кон сите четири страни на светот.
„Не можам да го заборавам вниманието што го покажувате кон Словаците кои живеат овде. Сакам да истакнам дека тоа се Словаци кои ја сакаат Србија, земјата во која живеат, а во исто време се обидуваат да ги зачуваат традициите што ги донеле кога дошле овде“, рече Фицо.
Тој рече дека Словачка почитува оти Србија е во претпристапни преговори со ЕУ и дека ќе ја поддржи секоја одлука што ќе ја донесе.
„Би сакал да го понудам уникатното искуство на Словачка од пристапните преговори кои резултираа со влез на Словачка во ЕУ во 2004 година. Направивме трагични грешки во процесот на пристапување што ја ослабна, на пример, нашата енергетска безбедност. Направивме грешки кои имаат други димензии. Честопати бевме под притисок да носиме одлуки кои никогаш не би ги донеле под други околности“, изјави Фицо.
Според него, светот е нервозен кога е во прашање конфликтот во Украина, прекинувајќи ги долгогодишните врски кога станува збор за снабдувањето со енергија.
„Со гордост можам да кажам дека вчера ги одобривме следните чекори за изградба на нов нуклеарен реактор, кој ќе ни обезбеди не само доволно енергија за нашата земја, туку и за извоз“, рече Фицо, додавајќи дека со задоволство ќе го сподели своето искуство со Србија и на тоа поле.
Разговараа и за соработката на компаниите во областа на водоснабдувањето, но и за безбедносните прашања.
„Република Словачка сака да се врати со војници во Косово во мисијата КФОР. Ве молиме сфатете го како услуга, бидејќи сакаме светот да добие објективни информации и ние сакаме да ги имаме“, рече тој и додаде дека сакаат да помогнат.
Вучиќ рече дека е исклучително задоволен што можеле да разговараат за сите стратешки прашања од билатералните односи меѓу Србија и Словачка за унапредување на економската соработка, соработката во различни области од енергетиката до туризмот.
Тој изјави дека и денес се обидел да научи многу работи од Фицо, како што своевремено научил да користи ваучери за домашните туристи за што повеќе луѓе да останат во Србија наместо да трошат пари во странство.
„И како што знаете, веќе осум години со голем успех го применуваме тој систем на ваучери кај нас. Наскоро пред јавноста ќе ги претставам новите идеи што ги добив од премиерот Фицо и верувам дека граѓаните на Србија ќе бидат задоволни со нив“, рече Вучиќ.
Тој посочи дека разговарале и за геополитичката ситуација на Србија и Словачка.
„Она што можам да го кажам е дека заеднички веруваме дека мирот во Украина е неопходен и за Русија, бидејќи дел од војната денес се одвива на територијата на Русија. Така што мирот е нешто што е исклучително важно, дека понатаму, идните или веќе донесените одлуки, кои само дополнително го разгоруваат воениот конфликт, не носат ништо добро за ниту една од завојуваните страни, но и за никој од нас во Европа“, рече Вучиќ.
Тој посочи дека Србија и Словачка заеднички ќе ги бранат достигнувањата во борбата против фашизмот и нацизмот од минатото и заеднички нема да дозволат ревизија на историските факти.
Вучиќ додаде дека Србија е шокирана од нападот врз премиерот Фицо, наведувајќи дека тие многу добро го разбираат како порака на омраза која со месеци и години се ширела против премиерот на Словачка.
„Денеска разговаравме, освен за важни политички прашања и за желбата да имаме поинаков пристап од оној што е мнозински на европско и светско тло, во кој секој сака некого да победи или некого да порази – сакаме мир“, рече Вучиќ. и додаде дека така ќе продолжат српската политика.
Тој додаде дека разговарале за воспоставување на авионски линии меѓу Белград и Словачка и дека има две опции, Белград-Кошице, која би била посоодветна за Србија, и Белград-Братислава, како и за искуството на Словачка во нуклеарната програма и за инвестиции на словачки компании.
Тој му се заблагодари на премиерот на Словачка што има 60 војници на Косово.
