Турскиот министер за надворешни работи Хакан Фидан, кој е во посета на Грција, изјави дека двете земји мора да ја искористат историската шанса пред нив, да дејствуваат со взаемна доверба и вечното соседство да го претворат во вечно пријателство.
„Односите меѓу Туркије и Грција напредуваат позитивно. Нашата повеќедимензионална соработка станува посилна. Заедно преземаме важни чекори во областите како што се трговијата, економијата, транспортот, туризмот и културата“, рече Фидан на заедничката прес-конференција одржана по средбата со неговиот грчки колега Јоргос Иерапетритис во Атина.
Фидан понатаму изјави дека Туркије и Грција прават напори подобро да се разберат, особено во тие критични прашања.
„Регионот во кој се наоѓаме има многу проблеми. Во оваа тешка географска област, Туркије и Грција мора да можат да работат со меѓусебна доверба. Мора да ја искористиме историската шанса пред нас и да ја направиме позитивната клима меѓу нашите земји постојана. Ние мораме да го претвориме нашиот вечен сосед во вечен пријател. Не се сомневам дека оваа цел можеме да ја постигнеме со искрено и конструктивно разбирање“, рече Фидан.
Зборувајќи за трговските односи меѓу двете земји, Фидан потсети дека целта на трговската размена е 10 милијарди долари и дека продолжуваат заедничките напори за постигнување на оваа цел.
„Факт е дека имаме различни мислења за прашањето за Егејското Море. За ова разговаравме и на консултативни состаноци во минатото. Мораме да дејствуваме реално и правилно да ги дијагностицираме нашите проблеми. Има многу меѓусебно поврзани проблеми во Егејското Море на кои треба да работиме и да бараме решенија за нив и соработка“, рече Фидан.
Наведувајќи дека на средбата со Јерапетритис било разговарано и за кипарското прашање, Фидан рече дека ставот на Туркије по ова прашање е јасен и дека ќе продолжи да го решава кипарското прашање врз основа на фактите на островот.
Тој додаде дека „има потреба од нов дух на островот кој ќе овозможи безбедност, слобода и просперитет и за Турците и за Грците“.
Фидан изјави дека на средбата со Јерапетритис и неговата делегација истакнале дека очекуваат поефикасна соработка со соседна Грција во борбата против терористичките организации, особено ФЕТО, ПКК и ДХКП-Ц. Нагласена е и важноста од заедничко дејствување во борбата против нерегуларната миграција.
На средбата соговорниците ги оценија случувањата на Блискиот Исток, Украина и на Балканот.
„Како Туркије, не сакаме да видиме војна, солзи и драма во нашиот регион. Сакаме што поскоро да се постигне мир на Блискиот Исток, во согласност со визијата за решение со две држави за палестинското прашање. За таа цел, меѓународната заедница мора да продолжи да го зголемува реалниот и сериозен притисок врз Израел. Во спротивно, фанатизмот на Нетанјаху, за жал, ќе продолжи да носи крв во регионот“, заклучи Фидан.
