Министерот за надворешни работи на Република Туркије, Хакан Фидан, денеска во Приштина изјави дека неговата земја, во рамките на меѓународните договори, ја поддржува безбедноста и стабилноста на Косово, како и на другите пријателски и сојузнички земји, а тоа ќе продолжи и во иднина.
Шефот на турската дипломатија Фидан, по посетата на Северна Македонија, денеска е во посета на Косово, при што во Приштина се сретна со вицепремиерката и министерка за надворешни работи и дијаспора на Косово, Доника Гервала-Шварц.
По средбата, Фидан на новинарите им изјави дека во Приштина се чувствува како дома и дека со највисоките претставници на Косово ќе разговара за голем број важни билатерални, регионални и глобални теми. Тој додаде дека ќе ги посети и базите на КФОР на Косово, каде што има и припадници на турските вооружени сили.
„Косовците не се само наши пријатели, тие се и наши браќа и сестри. Сакаме нашите нераскинливи врски на најдобар можен начин да ги пресликаме во нашите билатерални односи. Нашата цел е сеопфатна и стратешка визија. Гледаме безбедност, политика и економијата како статив на нашата соработка. Нашиот политички дијалог е веќе на одлично ниво“, рече Фидан.
Истакнувајќи дека потпишувањето на билатерален договор за безбедносна соработка ќе биде првиот чекор во создавањето институционална рамка за долгорочна соработка во таа област, Фидан најави и зајакнување на економските односи меѓу Анкара и Приштина, истакнувајќи дека целта е трговска да достигне милијарда евра во наредниот период.
„Инвестициите на турските компании во Косово веќе достигнаа сума од 500 милиони евра. Нашите компании овде вработуваат близу 10.000 луѓе. Сепак, овие бројки не се доволни и знаете дека нашиот претседател секогаш бара од нас да ја развиваме економската соработка со зголемување на инвестициите и отворање нови работни места“, рече Фидан.
Нагласувајќи дека на средбата во Приштина се разговарало и за настаните на Балканот, Фидан рече дека се разгледало што може да се направи за да се обезбеди траен мир и стабилност во регионот.
„Како што реков вчера во Северна Македонија, треба да се справиме со регионалните проблеми со регионален пристап. Како Туркије, ние придаваме големо значење Косово да застане цврсто на нозе како независна и суверена држава. Од самиот почеток, ние ги поддржувавме напорите за Косово да го заземе местото што го заслужува на меѓународната сцена, сакам да ја искористам оваа прилика да кажам дека оваа поддршка ќе продолжи“, рече Фидан.
Нагласувајќи дека заштитата на безбедноста и стабилноста на Косово е исклучително важна за градење траен мир и стабилност на целиот Балкан, Фидан рече дека мисијата КФОР, која во моментов успешно ја командува Туркије, има многу важна улога во Косово.
„Сметаме дека проблемите во односите меѓу Србија и Косово можат да се решат само со дијалог. Целосно ги поддржуваме сите напори во процесот на нормализирање на односите. Дијалогот меѓу Приштина и Белград е од клучно значење за ова. Туркије нема да бега од одговорност ако некоја страна бара нешто од неа во тој процес“, рече Фидан.
Тој најави и продолжување на зајакнувањето на воената соработка меѓу Туркије и Косово и соработка во областа на одбранбената индустрија.
Тој додаде дека на средбата разговарале и за борбата против тероризмот со акцент на неопходните чекори во борбата против терористичката организација ФЕТО.
„За жал, сè уште сме загрижени за присуството на ФЕТО на Косово. Овде сакам да истакнам дека ФЕТО е закана и за Косово. Одлучна борба против ФЕТО е неопходна за стабилноста и просперитетот на Косово. Тоа е она што е неопходно од аспект на нашето пријателство и братство“, рече Фидан.
