Министерството за надворешни и европски работи на Хрватска во четвртокот препорача сите несуштински патувања во Србија да се одложат поради несоодветен и неоснован третман на хрватските граѓани.
„Се препорачува да се одложат сите несуштински патувања, да се внимава, да се следи моменталната состојба и да се добијат подетални информации пред да се патува поради евидентираните несоодветни и неосновани постапувања на органите на Република Србија кон хрватските државјани, соопшти министерството во четвртокот попладне.
На хрватските граѓани им се советува и да избегнуваат места каде се собираат голем број луѓе.
Министерството забележува дека „во случај на потреба, хрватските граѓани имаат право во секое време да побараат контакт со Амбасадата на Република Хрватска во Република Србија“.
Министерот за надворешни работи Гордан Грлиќ Радман вчера во Давос најави дека ќе се промени препораката на МНР за патување во соседната земја заради заштита и безбедност на Хрватите.
„Колку што можам да видам, безбедноста е доведена во прашање“, изјави шефот на хрватската дипломатија.
Хрватска денеска испрати протестна нота до Србија поради петте хрватски државјани кои беа неправедно уапсени, а потоа протерани од Србија.
Тие се претставници на невладини организации кои учествуваа на работилниците организирани од Ерсте Стифтунг во Белград. Покрај протерувањето, Србија им забранила влез во земјава на една година.
Министерството за надворешни работи, исто така, систематски ќе ги собира сите случаи на малтретирање хрватски граѓани во Србија и за тоа ќе ја информира Европската комисија и полското претседателство со ЕУ.
