Хрватската Влада денеска донесе одлука за набавка на шест вооружени беспилотни летала од типот Бајрактар ТБ2 и одлука за дејствија за набавка на тенкови од типот Леопард.
По завршувањето на постапката за јавна набавка за периодот 2024-2026 година, министерот за одбрана Иван Анушиќ на средбата ја презентираше одлуката за набавка на дроновите Бајрактар ТБ2, во вкупен износ од 86.424.252 евра.
Покрај стоките и услугите што ќе се испорачаат според вкупната вредност на договорот, ќе се реализира и дополнителна испорака на опрема вредна два милиони евра, што е донација.
Анушиќ објави дека OСРХ изразила потреба од приоритетна и итна набавка на вооружени беспилотни летала на системот Бајрактар ТБ2 и додаде дека Министерството добило информации за конфигурацијата врз основа на шест дрона опремени со електро-оптички камери за извидување, вклучувајќи го и почетниот сет на оружје и обезбедува двојно радио покривање на целата територија на Хрватска во стационарни и мобилни варијанти.
Пакетот, рече тој, вклучува команден центар, симулатор за обука, станици за контрола, почетен сет на резервни делови доволни за 4.000 часа лет, вклучувајќи ја целата потребна опрема и алатки за одржување и гаранција за две години или до достигнување 4.000 часа лет, престој на експерти во Хрватска во период од две години, обука во нивниот центар за обука во Туркије и транспорт на целиот пакет до Хрватска.
На седницата на Владата беше усвоена и одлука за подготвителни дејствија за набавка на тенкови Леопард 2А8 за опремување на вооружените сили и трансфер на материјални ресурси во Украина во вид на тенкови М-84 и пешадиски борбени возила М-80, со придружните резервни делови и муниција.
Книговодствената вредност на материјалните средства е 144.800.000 евра, кои ќе бидат исплатени на Сојузното министерство за одбрана на Германија до 30 ноември годинава.
Пртеходно неделава Собраниската Комисија за одбрана едногласно ја поддржа набавката на осум ракетни системи ХИМАРС од САД, вредни 280 милиони евра.
Испораката на системот ќе биде во 2028 година, а со него ќе пристигнат и ракетите. Овој систем во моментов го имаат само три европски земји, Романија, Полска и Украина.
