Во Хрватска денеска започна еднонеделниот бојкот на шопинг во три трговски синџири, а граѓаните се повикуваат да не купуваат газирани пијалоци, флаширана вода и детергенти.
Неделниот бојкот се спроведува на покана на Платформата „Ало, инспекторе“, која најави низа активности за бојкот во наредниот период.
Јосип Келемен, советник на платформата за потрошувачи „Ало, инспекторе“, рече дека потрошувачите се заинтересирани за нов бојкот и дека тоа ја покажува силата на луѓето кои сакаат да го променат пазарот и да се соочат со нови поскапувања.
„Сакаме да испратиме уште посилна порака конечно да започнеме со регулирање на хрватскиот пазар и да започнеме надзорни механизми“, посочува Келемен.
Тој додаде дека ова е и начин да се изрази незадоволството од новите поскапувања.
Еден од малопродажните синџири во четвртокот објави дека во соработка со хрватските добавувачи инвестирале дополнителни милион евра во намалување и заклучување на цените на 250 домашни производи, кои не се вклучени во најавената одлука на хрватската Влада за ограничување на цените.
Како што посочуваат во соопштението, од сабота, 01.02.2025 година, покрај списокот на производи чии цени се ограничени од хрватската Влада, цените на дополнителни 250 производи ќе бидат намалени и заклучени и нема да се менуваат до 1. јуни 2025 година, освен што може дополнително да се намалат.
Просечниот попуст е околу 10 отсто, а на некои производи и повеќе од 30 отсто.
Минатата недела, во петокот, во Хрватска беше одржан еднодневен бојкот на купувањето, што предизвика пад на издадените фактури за 53 отсто во однос на истиот период седум дена претходно.
Повеќедневни кампањи за бојкот на набавките во одредени трговски синџири се спроведуваат и во Словенија, додека еднодневен бојкот ќе се одржи во петок, 31 јануари, во Словенија и Хрватска, како и во Србија, Црна Гора, Босна и Херцеговина и Северна Македонија.
