Хрватска е една од седумте земји на ЕУ кои произведуваат повеќе од 50 отсто од електричната енергија од обновливи извори во 2020 година, изјави Дамир Шљивац, раководител на Катедрата за електротехника на Факултетот за електротехника, компјутери и информациски технологии (ФЕРИТ) во Осијек. Шљивац говореше на конференцијата „За гигаБИТ зелена енергија“ каде околу 150 учесници презентираа уникатни примери за примена на обновливи и алтернативни извори на енергија.
Според Евростат, во 2020 година, обновливата енергија претставуваше 22,1% од потрошената енергија во ЕУ, околу 2 процентни поени над целта за 2020 година од 20%. Според европската статистичка организација, Хрватска имала 31 отсто потрошена енергија од обновливи извори и го надминала поставениот таргет.
„Од 2007 година имаме нови законски прописи за изградба на обновливи извори, кои ни овозможија да изградиме ветерни електрани и фотоволтаични системи, кои покрај значителното производство на електрична енергија од биомаса и биогас во постројките во Славонија, ни овозможуваат да произведеме 20 проценти од нашата енергија од обновливи извори“, посочи Шљивац.
Тој потсети дека зградата на ФЕРИТ најголемиот дел од електричната енергија ја добива токму од обновливи извори.
„Имаме околу 150 киловати фотоволтаични системи заедно со паметната микромрежа и системи за складирање што ги изградивме и се уште ги развиваме“, посочи тој и го најави големиот градежен проект на Научно-истражувачкиот центар за електротехника и компјутери кои ќе бидат исклучиво со обновливи извори на енергија.
Томи Медвед, раководител на Лабораторијата за енергетски стратегии на Електротехничкиот факултет на Универзитетот во Љубљана, го претстави проектот енергетска заедница - село на иднината во кое секој има соларна централа и станица за полнење на електрични возила.
„Не одевме толку за намалување на потрошувачката на енергија, туку за зголемување на производството во постоечките ограничени мрежи и постигнавме 180 до 300 проценти повеќе отколку што предвидуваа дека е можно“, рече тој.
Претседателот на Хрватското здружение за развој и примена на водород, Ивица Јакиќ, рече дека Хрватска усвоила стратегија за развој на водород до 2050 година, една од првите во Европската унија и со тоа дала насоки како треба да се произведува и применува водородот во Хрватска и како институциите треба да ја отворат вратата за реализација на проекти за водород.
„Цементни, челични и хемиски индустрии на кои им е потребен водород како енергенс без него нема да може да работат, рече Јакиќ, нагласувајќи дека тоа е единствениот извор на енергија кој нема штетно дејство, а неговиот нус производ е само чиста вода.
Тој, исто така, рече дека Хрватска е посветена на производство на водород со гасификација на отпадот.
„Тоа значи дека целиот комунален органски отпад може да се гасифицира и од него да се добива водород без никакви штетни ефекти. Нема горење, пиролиза и штетни емисии. 25 тони комунален отпад дневно се доволни за 43 водородни автобуси или 220 автомобили со водород“, рече тој.
