Инфлацијата ги празни паричниците на граѓаните во земјите од регионот. Вредноста на парите е се помала, а потрошувачката кошничка е се поскапа. Цените особено на прехранбените производи растат од ден на ден. Луѓето за слична сума можат да си дозволат многу помалку производи отколку истиот период минатата година. Светската енергетска криза во некои земји влијаеше за создавање инфлаторен шок каков што не се памети во последните триесетина години.
Во продолжение кус преглед на стапките на инфлација, порастот на трошоците на живот и износот на потрошувачките кошнички во државите од Западен Балкан.
Највисока инфлација во Северна Македонија од 1995 година
Државниот завод за статистика измери инфлација од 19,8 отсто во Северна Македонија. Се работи за највисока стапка на инфлација од 1995 година до денес. Воедно државата според последните достапни показатели има највисока стапка на инфлација во регионот.
За една година храната поскапела за 32,4 отсто, трошоците за комуналии за 9,6 отсто, а транспортот за 14,7 отсто. Од друга страна, според Сојузот на синдикати,потрошувачката кошничка за октомври достигнала 51.114 денари или 837 евра.
Различни пресметки во Србија
Стапката на инфлација во Србија изнесува 14,2 отсто. Српското министерство за трговија, туризам и телекомуникации пресметува просечна и минимална потрошувачка кошница. Просечната, со последните достапни податоци за месец август, изнесувала 88.282 динари или 725 евра. Додека минималната потрошувалка кошничка изнесувала 45.729 динари или 389 евра.
Сепак овие пресметки на министерството се разликуваат од оние на Самостојниот синдикат на Србија или на Сојузот на економисти на Србија. Синдикатот уште во јуни измерил дека минималната потрошувашка кошница е 51.500 динари или 439 евра, а Сојузот на економисти измери 50.197 динари или 427 евра.
Синдикатот пред неколку дена излезе со податок дека во Србија цените на прехранбените производи за една година пораснале за 23 отсто.
Потрошувачката кошничка во БиХ достигна 1.460 евра
Во Босна и Херцеговина цените пораснале за 17,2 отсто. Според Сојузот на самостојни синдикат, синдикалната потрошувачка кошничка во федерацијата Босна и Херцеговина во септември изнесувала 2.852 конвертибилни марки или околу 1.460 евра.
Со просечна плата во оваа држава може да се покрие 39, 9 отсто од потрошувачката кошничка додека со минимална плата 17,9 отсто.
16 отсто инфлација во Црна Гора
Црногорските статистичари пресметаа дека за септември 2022 потрошувачката кошничка во оваа земја изнесувала 781 евро. Во однос на септември минатата година тоа е зголемување за 17,5 отсто. Од 781 евро 366,7 евра оделе за храна.
Инфлацијата пак во Црна Гора во септември изнесувала 16 отсто.
Минимум 750 евра за едно домаќинство во Косово
Вкупната инфлација во Косово изнесува 12,7 отсто. Сепак косовската Агенција за статистика измери покачени цени за 19,45 отсто во просек кај земјоделските производи во септември годинава во споредба со 2021 година.
Проценките на косовската Агенција за статистика се дека на едно домаќинство за задоволување на потребите од потрошувачката кошничка му се потребни околу 750 евра.
Најголема инфлација во Албанија за дваесет години
ИНСТАТ Албанија пресмета дека во оваа земја инфлацијата во септември изнесувала 8,1 отсто. Во однос на претходниот месец тоа е зголемување само од 0,6 отсто, а 5,6 отсто во споредба со септември минатата година. Се работи за една од најголемите стапки на инфлација во последните дваесетина години.
Најголем пораст на цените се бележи кај храната, горивото и безалкохолните пијалаци.
Цените на храната пораснале за 15,2 отсто, а горивото за 21,2 отсто споредено со септември минатата година. На едно домаќинство месечно во оваа земја му се потребни минимум 770 евра.
