Министерот за надворешни работи на Босна и Херцеговина Елмедин Конаковиќ во средата во Будимпешта се сретна со министерот за надворешни работи и трговија на Унгарија, Петер Сијарто.
Министерството за надворешни работи на БиХ соопшти дека на средбата било посочено дека билатералната соработка меѓу БиХ и Унгарија е обемна и без отворени прашања. Беше изразено уверување дека добрата соработка во повеќе области ќе се интензивира и унапредува и во наредниот период.
„За време на средбата, министерот Конаковиќ извести за актуелната внатрешно-политичка ситуација во Босна и Херцеговина, со посебен осврт на усвојувањето на пет важни закони на патот кон Европската унија. Тој го информира соговорникот дека интензивно се работи и на финализирање на Предлог-законот за спречување судир на интереси. Тој оцени дека би било исклучително важно Босна и Херцеговина да добие одлука за отворање на пристапните преговори на претстојниот состанок на Европскиот совет“, се наведува во соопштението.
Конаковиќ додаде дека пристапните преговори дополнително ќе ја зајакнат надворешната политика на БиХ и ќе обезбедат јасна институционална рамка за реформа на општеството. Тој ја изрази својата благодарност до Унгарија за поддршката и помошта што и ја дава на БиХ на нејзиниот европски пат.
Министерот Сијарто посочи дека Унгарија целосно го поддржува европскиот пат на БиХ. Тој нагласи дека Унгарија, како членка на ЕУ, игра важна улога во поддршката на напорите на Босна и Херцеговина кон европската интеграција, нудејќи помош во процесот на пристапување.
Тој се осврна на претседавањето со Советот на ЕУ, кое Унгарија го презема од 1 јули годинава, а една од главните цели ќе биде забрзување на процесот на интеграција на земјите од Западен Балкан во ЕУ.
„Тој оцени дека овој процес носи мир и стабилност во регионот. Тој повтори дека Унгарија распоредила двајца дипломати да му помагаат на МНР на БиХ во областа на интеграцијата во ЕУ и НАТО и обезбедила обука за 50 службеници од јавната администрација на БиХ во Дипломатската академија на Унгарија, кои ќе имаат можност да учат од унгарски искуства за чекорите во рамките на процесот на пристапување во ЕУ и предизвиците кои се на тој пат, кои ќе бидат од голема помош за нашата земја“, се наведува во соопштението.
По средбата, министрите Конаковиќ и Сијарто го потпишаа Акциониот план за трансфер на знаења за процесот на пристапување во Европската унија меѓу Министерството за надворешни работи на Босна и Херцеговина и Министерството за надворешни работи и трговија на Унгарија.
