Косовската полиција истражува пријава за обид за убиство во Сочаница, општина Лепосавиќ, а според најавата на заменик министерот за заедници и враќање во Владата на Косово, Радоица Радомировиќ, направен е обид за убиство на Марко Јаблановиќ, член на партијата на министерот Ненад Рашиќ.
„Пријавителот пријавил дека при влегувањето во локал во близина забележал маскирано лице со пиштол во рака, кој го вперил кон жртвата, но не пукал. На местото на настанот излегле полициски единици, а со одлука на обвинител случајот оди во редовна постапка“, се наведува во редовниот 24-часовен извештај на косовската полиција.
Заменик министерот Радомировиќ на Фејсбук ги објави деталите за обидот за убиство на Марко Јаблановиќ, член на партијата „За слобода, правда и опстанок“. Тој изјавил дека петнаесетина минути по полноќ, на 5 мај, во Сочаница пред кафулето „Клуб Б“ бил извршен обид за убиство на Марко Јаблановиќ. Радомировиќ го обвини белградскиот режим и поранешните членови на Српската листа за обид за убиство.
„Трагичниот настан не се случи бидејќи на напаѓачот му откажа автоматското оружје од типот „шкорпион“. Нема сомнеж дека зад обидот за атентат стои режимот во Белград, како и Радоичиќ и локалните каубои“, напиша Радомировиќ.
Тој потсети дека тој и Марко биле на списокот на партијата на Александар Јаблановиќ, кој се повлече два дена пред изборите за градоначалник на Лепосавиќ, во април минатата година, по договор со Белград.
„На последната средба со Александар Јаблановиќ бевме предупредени дека сме во опасност да бидеме убиени бидејќи работиме против интересите на режимот“, посочува Радомировиќ и го повикува Александар Јаблановиќ јавно да излезе и да каже со кого имал таков разговор.
„Нема да се предадеме и да се повлечеме без оглед на секојдневните закани и цената што ја плаќаме и лично и за нашите семејства“, вели Радомировиќ.
Во моментов во Северна Митровица, Звечан, Зубин Поток и Лепосавиќ, општини на северот на Косово каде живее мнозинско српско население, градоначалници се Албанци, како резултат на тоа што Србите ги бојкотираат вонредните локални избори одржани на 23 април 2023 година по повик на Српската листа.
Српското население го бојкотираше и неодамнешното гласање за смена на актуелните градоначалници, кое на 21 април го организираше Централната изборна комисија на Косово.
