Собранието на Косово на денешната пленарна седница со 86 гласа „за“ ја усвои Декларацијата за поддршка на резолуцијата на Европскиот парламент во врска со вооружениот напад врз косовската полиција на 24. септември во Бањска, кај Звечани.
Шефот на пратеничката група на опозициската Алијанса за иднината на Косово (ААК), Бесник Тахири ги изнесе точките од оваа декларација.
„Собранието силно ги поддржува повиците и препораките на ЕП Србија да се смета за меѓународно одговорна како предмет на неопходна меѓународна истрага во врска со откривањето на нејзината улога и вмешаност, утврдување на редот, планирањето, поддршката и организацијата на терористичкиот напад. на 24. септември 2023. Се приклучува на барањето на ЕП пред планерите и учесниците во нападот на 24 септември, како и секој поединец или субјект, кој на некој начин помогнал во реализацијата на тој терористички напад, да биде екстрадиран на Косово“, нагласи Тахири.
Во декларацијата се наведува дека косовското Собрание високо ги цени позициите кои ја нагласуваат важноста од укинувањето на мерките против Косово и воведувањето казнени мерки против Србија.
ЕП е поканет да одигра уште посилна улога во однос на позицијата на петте земји од ЕУ кои не ја признаа независноста на Косово.
Во Декларацијата се нагласува дека во однос на демократските вредности и принципи, зајакнувањето на партнерството со земјите-членки на ЕУ, соработката со механизмите на земјите од НАТО, високо се вреднува поддршката од Европскиот парламент.
На 19 октомври, Европскиот парламент усвои Резолуција со која остро се осудува нападот на 24 септември во Бањска, на северот на Косово. Европратениците побараа целосна истрага за нападот во Бањска и воведување мерки против Владата на Србија, доколку се докаже дека во тој напад била вмешана и државата Србија.
Резолуцијата на ЕП го повикува Советот на Европската унија да воведе насочени рестриктивни мерки против дестабилизирачките актери на северот на Косово и Милан Радоичиќ и другите водачи на големите мрежи на организиран криминал.
Во напад на група вооружени Срби на 24 септември во Бањска, еден косовски полицаец беше убиен, додека најмалку тројца напаѓачи беа убиени. Одговорноста за организацијата на нападот ја презеде Милан Радоичиќ, поранешниот потпретседател на Српската листа.
