Ковачевски: Решавање на отворените прашања е од огромна важност за регионот

Отворениот дијалог со кој се решаваат отворените прашања е од огромна важност за регионалната стабилност, одржувањето на мирот и патот кон проспериетна иднина, не само за Србија и Косово, туку и за целиот регион.

Ова е пораката којашто денеска ја потенцираше премиерот на Република Северна Македонија Димитар Ковачевски кој во Охрид одржа прес-конференција во својство на домаќин на состанокот на високо ниво од дијалогот меѓу Белград и Приштина, кој го водат претседателот на Србија, Александар Вучиќ и премиерот на Косово, Албин Курти, под покровителство на Европската Унијa, а со поддршка на Соединетите Американски Држави (САД). Ковачевски информираше дека на негово барање утрово одржал одделни билатерални средби со претседателот Вучиќ и со премиерот Курти.

„Сакав лично да им укажам на важноста која како земја сосед на Србија и на Косово ја посветуваме на овој состанок и да им посакам успех во дијалогот бидејќи цвсто верувам дека е неопходен и единствен пат до решение во демократскиот свет во 21 век“, рече Ковачевски.

Според него, дијалогот е единствената алатка за консолидација на регионот и за европската интеграција на двете земји.

Тој потенцираше дека Република Северна Македонија не случајно е избрана како земја домаќин на овој дијалог.

„Северна Македонија денес е препознаена како почитуван партнер на меѓународната заедница и фактор на стабилност во регионот. Договорите кои ги потпишавме, Охридскиот, Преспанскиот, како и Договорот за добрососедство, се потврда за нашиот европски дух, за затворање на прашања со кои го трасираме патот за иден развој на земјата“, подвлече Ковачевски. Македонскиот премиер додаде дека земјите во регионот имаат раководства кои се однесуваат европски, а нивните земји заслужуваат европска перспектива. „Токму затоа сега е вистински момент да се забрза евроинтегративниот процес кој е важен за сите земји од Западен Балкан“, рече Ковачевски.

По состанокот одржан на 27 февруари во Брисел, високиот претставник на ЕУ за надворешна и безбедносна политика Џозеп Борел изјави дека Косово и Србија постигнаа согласност околу Европскиот план, додека останува да се разговара за неговата имплементација.

Според официјалните најави, фокусот на денешниот состанокот на Вучиќ и Курти во Охрид со посредство на ЕУ ќе биде насочен кон финализација на Анексот за примена на планот на ЕУ за патот на нормализација на односите на Косово и Србија.