Претседавачот на Советот на министри на Босна и Херцеговина, Борјана Кришто, во Давос на Светскиот економски форум разговараше со претседателот на Република Србија, Александар Вучиќ за подобрување на билатералните и регионалните односи во контекст на интеграцијата во Европската унија.
Кришто рече дека се разговарало за многу приоритети, оценувајќи дека разговорот бил многу пријатен и конструктивен. Таа истакна дека добрите билатерални односи меѓу Босна и Херцеговина и Србија се многу важни за двете земји, но и за целиот регион.
Таа додаде дека Босна и Херцеговина сака да има добра и конструктивна соработка со Република Србија и да ги решава отворените прашања со добра волја и преку дијалог, бидејќи тоа е единствениот начин да се создаде стабилна и безбедна средина, кои се основни предуслови за економски напредок што е од заеднички интерес и од особено значење за двете земји.
Кришто истакна дека со нетрпение ја очекува официјалната посета на Белград. Воедно, беше потврдено дека делегацијата на Република Србија ќе слета на аеродромот во Мостар со цел учество на саемот во Мостар во април годинава, со што и официјално ќе биде означено отворањето на линијата Белград-Мостар.
