Високиот претставник во Босна и Херцеговина Кристијан Шмит им порача на граѓаните дека нема преговори за Босна и Херцеговина и дека таа продолжува да напредува на нејзиниот европски пат.
Амбасадорите на Управниот одбор на Советот за спроведување на мирот (ССМ) се состанаа денеска во Сараево за да разговараат за актуелните политички случувања во врска со судската постапка против претседателот на ентитетот Република Српска (РС) Милорад Додик.
„Членовите на Управниот одбор ја поздравија неодамнешната одлука и изјава на Мисијата на ОБСЕ во БиХ и уште еднаш ги повикаа сите да се воздржат од интервенција, притисок и политички закани и да ја почитуваат независноста на судството на БиХ“, рече Шмит во јавното обраќање пред зградата на Канцеларијата на високиот претставник (ОХР).
Тој рече дека членовите на Управниот одбор на ССМ уште еднаш ја потврдиле својата недвосмислена посветеност на територијалниот интегритет на целата држава Босна и Херцеговина, која се состои од два ентитета и округот Брчко.
„Би сакал да испратам лична порака до граѓаните на БиХ. Разбирам дека многумина од вас се навистина загрижени за последните случувања. Бидете уверени дека меѓународната заедница останува будна и внимателна. Дејтонскиот поредок и државните институции продолжуваат да се штитат и мора да се почитуваат“, рече Шмит.
Тој исто така рече дека меѓународната заедница останува цврсто посветена на мирот и стабилноста во регионот.
„Нема преговори за Босна и Херцеговина. БиХ ќе продолжи да напредува на својот европски пат. Знам дека граѓаните на оваа земја го разбираат и се посветени на патот кон европските институции и на тој пат поддршка ќе имаат и граѓаните и институциите“, заклучи Шмит.
Првостепената пресуда за случајот против Милорад Додик и вршителот на должноста директор на Службен весник на РС, Милош Лукиќ, пред Судот на БиХ е закажана за среда, на 26 февруари.
Обвинителството на БиХ ги товари за сторено кривично дело „неспроведување на одлуките на високиот претставник во БиХ“.
Доколку бидат прогласени за виновни, им се заканува казна затвор до пет години и забрана за политичка активност.
Во Бања Лука за денеска и утре се најавени собири за поддршка на Додик, а опозициските партии не учествуваат.
