Премиерите и претседателите на држави од регионот му ја честитаат победата на Доналд Трамп кој по втор пат ќе биде претседател на Соединетите Американски Држави (САД).
Македонскиот премиер Христијан Мицкоски преку платформата Фејсбук упати честитка до републиканскиот кандидат Доналд Трамп за победата на изборите за претседател на САД.
„Оваа победа е потврда на длабоката верба на американскиот народ во принципите на слободата и демократијата. Со нетрпение очекуваме натамошно продлабочување на нашето цврсто партнерство и соработка, особено во областите на безбедноста, економскиот развој и демократските реформи“, напиша Мицкоски во честитката.
Шефот на Владата на Албанија, Еди Рама, ја опиша победата на Трамп во претседателската трка како исклучителна.
„Беше вистинска чест да се работи заедно со 46-тиот претседател на Соединетите Држави за зајакнување на врската меѓу нашите две земји. Со нетрпение ја очекувам големата привилегија да работам со 47-от претседател за дополнително унапредување на нашето партнерство за мир, просперитет и понатамошен напредок“, напиша Рама на X.
Честитка до Доналд Трамп упати и претседателката на Косово, Вјоса Османи, која потенцира дека САД остануваат непоколеблив партнер и незаменлив сојузник на Косово.
„Со нетрпение очекувам да работам со новата администрација за понатамошно продлабочување на нашата единствена врска и стратешки сојуз. Господ да ја благослови Америка, и лидерот на слободниот свет“, вели претседателката Османи. Таа, меѓу другото, му честиташе и на Џеј-Ди Венс за неговото назначување на позицијата потпретседател на САД.
Честиташе и српскиот претседател Александар Вучиќ, кој рече : „Заедно ни претстојат сериозни предизвици. Србија е посветена на соработка со САД за стабилност, просперитет и мир“.
