Вишиот суд во Смедерево го осуди Урош Блажиќ на 20 години затвор бидејќи ноќта меѓу 4 и 5 мај минатата година уби девет, а рани 12 лица во селата Мало Орашје и Дубона во близина на Белград.
Урош Блажиќ е осуден на 20 години затвор за кривичното дело тешко убиство, 10 години за недозволено држење на оружје, 10 години за киднапирање и три години за неовластено користење туѓо возило.
Судот му изрекол збирна казна затвор од 20 години, бидејќи во моментот на извршување на делото немал 21 година, па е осуден на максимална можна казна за помлади полнолетни лица.
Српскиот кривичен законик предвидува доживотен затвор само за оние над 21 година.
Од безбедносни причини првостепената пресуда беше објавена во просториите на Специјалниот суд во Белград.
Обвинителството во завршните зборови побара што построга казна за Блажиќ бидејќи во суштината на делото и начинот на кој е сторено не може да има олеснителни околности.
Судијката Лидија Јовановски повеќе од еден час детално ги читаше наводите од обвинението, посочувајќи дека изречената казна „ниту е правична, ниту соодветна“, но дека судот е обврзан со законот, според кој Блажиќ, кој бил дваесет години стар во моментот на убиството, како малолетник, не можел да добие построга казна од 20 години затвор.
Според неа, Блажиќ „покажал бруталност, непромисленост и отсуство на каква било емпатија“ кон жртвите со масовното убиство на претежно врсници или дури и помлади луѓе во селата Мало Орашје и Дубона.
Тој на почетокот на судењето ја призна вината и во последните зборови побара најстрога казна, дури и смртна казна, иако Србија во 2002 година ја укина смртната казна.
Во казната на Урош Блажиќ е вклучено и време поминато во притвор, почнувајќи од 5 мај 2023 година.
Судот денеска го осуди и таткото на Блажиќ, Радиша, полковник во пензија, на 20 години поради незаконско држење на оружјето, со кое е извршено кривичното делона 20 години затвор.
Во обвинението се товари дека „во состојба на намален разум, но не суштински, нелегално набавувал оружје, делови од оружје, експлозиви и муниција“ кои граѓаните не смеат да ги поседуваат и за предизвикување општа опасност со смртни последици за повеќе лица.
Ова е првостепена пресуда против која обвинителството и одбраната имаат право на жалба.
