Христијан Мицкоски Претседателот на македонската влада во новогодишната честитка до граѓаните порача дека годината која изминува била исполнета со „тешки и сериозни околности не само кај нас, туку и во целиот свет“ и дека „данокот и ефектите од постапките на претходните политички раководства“ и влијанието на војните во повеќе региони низ светот, денес сè уште ги живееме сите.
„2024 беше година кога граѓаните избираа каква иднина сакаат и одбраа одлучни и убедени како никогаш до сега, Македонија да биде повторно нивна. Таа победа не беше само број, тоа беше јасен мандат од народот за нов пат и нова визија. Ве уверувам ние ја почитуваме и ја чуваме таа доверба и секој ден работиме напорно за да ги исполнуваме ветувањата кои ги дадовме и ние таа заклетва и одговорност не ја забораваме“, порача премиерот Мицкоски.
Тој истакна дека наследиле држава која беше потоната во криминал и нефункционалност, која се соочуваше со сериозни проблеми, а турбуленциите и економско-социјалните и институционалните предизвици однесоа многу време и енергија.
„Можеби работите за некого не одеа со посакуваната брзина, но ве уверувам дека ова е единствениот пат и дека се е работа на добро осмислен план, според кој свесни за вашите очекувања ќе ги реализираме ветувањата и ќе го направиме тоа што го очекувате од нас, тоа за кое не одбравте“, рече тој.
Во однос на досегашните шест месеци од работата на новата влада премиерот Мицкоски рече дека направиле низа на чекори кои треба да ја стабилизираат економијата, и кои довеле до посакуваниот раст од 3 отсто „кој претходно дури и во проекциите за Светската банка беше недостижен“.
„Ги зголемивме пензиите, линеарно за 2.500 денари, а од март следната година следува ново покачување. Постигнавме зголемување на платите во образованието за минимум 46% во следните 4 години, додека тие во здравството веќе пораснаа за 10 отсто, а во следните четири години ќе пораснат за 40 до 50%. Вработуваме 300 млади доктори и специјализанти“, ги истакна премиерот промените во социјалната и здравствената заштита.
Во однос на дел од заемот од унгарската влада посочи дека се издвоени 250 милиони евра за проекти кои ќе ги спроведат општините како изградба на нови градинки, училишта, спортски сали, водови. Останатите 250 милиони евра се наменети за поддршка на развојот на стопанството по ниска камата од 1.95%.
„Постигнавме рекорд за привлекување на странски инвестиции над 1 милијарда евра и обезбедивме или забрзавме 8 нови странски инвестиции за нови 2.800 вработувања и многу, многу други проекти. Отворивме и фронт за борба против криминалот и корупцијата. Со докази, чекор по чекор, но одлучно“, рече премиерот Мицкоски.
Во 2025 година фокусот ќе биде ставен на три главни теми како забрзан економски раст, борба против корупцијата и интеграција во Европската Унија.
„2025 година ќе биде година на надеж, оптимизам, успеси и многу работа! Ќе работиме напорно и посветено во 2025 година, за да успееме да ја изградиме Македонија каква што сите вие граѓаните ја посакувате и каква што сите ние заедно ја заслужуваме“ порача премиерот Мицкоски во новогодишната честитка.
