Претседателот на Владата, Христијан Мицкоски во интервју за МРТ истакна дека неговата дискусија на Самитот EУ- Западен Балкан, во однос на проблемот со Бугарија, се водела од тоа дека потребно е решение кое ќе гарантира да го изодиме патот до крај, но преговори за идентитетски прашања не доаѓаат во предвид.
Тој истакна дека договорите со соседите треба да се читаат такви какви што се бидејќи во двата ни ветуваат безусловна поддршка на патот кон ЕУ.
„Тоа беше и мојата дискусија и вчера и денеска дека билатералната соработка е клучна кога зборуваме за економска соработка, туризам, кога зборуваме за развој на „know how“ вештини, образование и тука тој процес има додадена вредност. Но доколку билатералните разговори и преговори се однесуваат на идентитетските прашања, тогаш тој процес никако не може да заврши успешно бидејќи е поврзан со емоција“, потенцираше премиерот Мицкоски.
Мицкоски додаде дека секој процес кој е поврзан со емоцијата тогаш не може да биде процес кој ќе се темели на напредок, квалитет на испорака, резултати.
„Затоа замолив емотивните билатерални прашања да ги оставиме настрана и да ги читаме правилно договорите. Не може за едниот договор да важи правилото „Pacta sund servanda”, а за другиот да не важи. Што е заедничко за нив, тоа е дека и едниот и другиот договор велат дека земјите членки кои се втора страна, во едниот Грција, во другиот Бугарија треба безусловно да не поддржуваат. Никаде, посебно во Договорот за добрососедство, не стои реченицата или делот кој нас не обврзува на уставни измени. Ајде правилно да ги гледаме работите, на вистината мора во очи да и погледнеме, не онака како што нас ни одговара и да покажуваме политички мускули и на тој начин да ги вртиме работите. Јас сакам да ги гледам работите такви какви што се, и едниот и другиот договор ветуваа безусловна поддршка од нашите соседи за нашиот пат кон полноправно членство во рамки на Европската Унија“, рече премиерот.
Мицкоски нагласи дека билатерална соработка за идентитетски прашања не доаѓа во предвид, затоа што тука има емоција, нема рационално.
„Никому не оспоруваме ништо и не сакаме нас да нѐ оспоруваат. Мојот многувековен идентитет е мој многувековен идентитет, мојот мајчин македонски јазик е мој мајчин македонски јазик. кој има вековни корени. Било кој ќе отвори тема на овие прашања, тогаш тој не му мисли добро ниту на соседот, а уште помалку ги почитува европските вредности, коишто велат обединети во различностите. Ценам дека направивме многу како влада во изминатиов период, многу работевме за да можеме денеска отворено да ги зборуваме работите и да бараме решение, но не решение кое ќе не доведе да ја прескокнеме првата пречка, туку да го изодиме патот до крај. Веќе на секој му е јасно, ќе најдеме решение, а ние како влада сме подготвени да работиме колку што е потребно за да дојдеме до тоа решение“, изјави премиерот Мицкоски.
Тој истакна дека е важно да се напомене, како што кажал еден од премиерите на земјите членки, е дека според него, ова бил самит на којшто најотворено најдиректно и најискрено се кажани работите и од лидерите на Западен Балкан, но и од лидерите на земјите членки на ЕУ.
„Такво беше и моето чувство. И во работниот дел и на работната вечера неколку часа, навистина многу отворена дискусија, многу отворени дебати, многу работи беа кажани, многу споредба со минатото. Еден друг, исто така влијателен премиер, кажа дека и во 2004 година, кога имаше голем бран на проширување на ЕУ, ниту една од тие земји коишто станаа членки не ги исполнуваа критериумите согласно поглавјата, согласно кластерите итн. Но постоеше храбра политичка одлука пакетот да се затвори, односно сите тие земји да станат членки на ЕУ, па така и сега очекувам дека ќе се создадат услови за една храбра одлука од страна на ЕУ да можат сите земји од Западен Балкан наеднаш да бидат примени во ЕУ“, рече Мицкоски.
Тој додаде дека тоа што е многу важно за нас како држава што во ЕУ почнува да се слуша поинакво мислење од она понизно и вовлекувачко на владите во изминативе 7 години.
„Она коешто за нас е многу важно е дека напредувањето ќе биде по заслуги. Потенцирано е и во резолуцијата и во заклучоците. Она коешто за нас е важно е дека се слуша поинакво мислење од она коешто се слушало досега, односно понизно,вовлекувачко мислење коешто поранешните влади во изминативе седум години го правеле овде во Брисел, туку реално се соочуваме со проблемите и ги кажуваме оние наши стравувања и грижи кои се, се бара план. Тоа е она коешто мене ме прави задоволен“, потенцираше Мицкоски.
Тој потенцираше и дека како земја сме пофалени и за Планот за раст, дека најквалитетно сме го завршиле нашето досие и дека доколку се оди по планот очекува првата транша да ја добиеме до крајот на годината.
Мицкоски и додаде дека самите земји членки на ЕУ се изморени од објаснување зошто процесот за зачленување не треба да се билатеризира туку да се европеизира.
