Претседателот на Црна Гора, Јаков Милатовиќ, денеска за време на отворањето на самитот на Процесот за соработка во Југоисточна Европа (ПСЈИЕ) во Подгорица, со кој завршува претседавањето на земјата со оваа регионална иницијатива, изјави дека европската интеграција е главниот катализатор за реформите во регионот.
„Со денешната средба ја заклучуваме годината која донесе бројни предизвици, што уште поочигледно ја направи важноста на блиската соработка и партнерство за постојана стабилност и отпорност на Југоисточна Европа“, рече Милатовиќ на отворањето на самитот.
Тој оцени дека изминатата година ја одбележале низа позитивни поместувања на европската агенда, отворањето на преговорите со Скопје и Тирана, давањето статусот на кандидат на Сараево, Кишњев и неодамнешното одобрување на визната либерализација за Приштина.
„Поставени како сеопфатен приоритет на нашето претседателство, европската интеграција останува главен катализатор за неопходните политички, институционални, економски и безбедносни реформи за аспирантите од нашиот регион и пошироко. Регионот мора да најде консензус за да продолжи напред со заеднички напори и да го забрза процесот на интеграција. Според тоа, членството во Европската унија не треба да се гледа како еднократен збор, туку како постојан баланс на взаемна одговорност и придобивки“, рече Милатовиќ.
Тој потсети дека Црна Гора неодамна ја прослави 6-годишнината од членството во НАТО и дека влезот во Алијансата може да се смета како увертира за приемот на земјата во ЕУ.
Претседателот на Црна Гора рече дека е привилегија што на самиот почеток на својот мандат има можност да размени мислења со највисоките претставници на учесниците на ПСЈИЕ за можностите за натамошен развој на регионалната соработка во рамките на овој важен форум.
„Црна Гора придава големо значење на зајакнувањето на регионалните врски и ја гледа регионалната соработка како предуслов за севкупен развој, стабилност и обезбедување подобар квалитет на живот за сите наши граѓани“, рече тој.
Тој изјави дека заканите кои произлегуваат од руската инвазија на Украина ја доведоа безбедноста на самиот врв на регионалната и европската политичка агенда и додаде дека членките на ПСЈИЕ се длабоко загрижени поради актуелните тензии во регионот и оти очекува одржливи решенија да бидат постигнати преку мир и дијалог.
Тој рече дека Црна Гора ја доживеа својата прва демократска транзиција пред само три години и дека постојана стабилност не може да се постигне без целосно функционална демократија.
На самитот на кој ќе биде усвоена заедничката декларација ќе присуствуваат високи претставници на учесниците на ПСЈИЕ: претседателот на Северна Македонија Стево Пендаровски, претседателката на Косово Вјоса Османи, претседателот на Бугарија Румен Радев, претседателот на Албанија Бајрам Бегај, премиерот на Хрватска Андреј Пленковиќ, прв вицепремиер и министер за надворешни работи на Србија Ивица Дачиќ, потпретседател на Владата на Молдавија Олег Серебријан, министерот за надворешни работи на Туркије Хакан Фидан, генералниот секретар на Советот за регионална соработка Мајлинда Брегу, како како и претставници на Европската комисија, Европската служба за надворешни работи, Романија, Грција и Словенија. Претседавањето со ПСЈИЕ од Црна Гора на 1 јули ќе го презеде Северна Македонија.
