Хрватска од самиот почеток силно ја поддржува Црна Гора на нејзиниот европски пат, но мора да реши некои прашања, кои не се од билатерална природа, туку се универзални, изјави денеска хрватскиот министер за надворешни работи Гордан Грлиќ Радман во Брисел.
Црна Гора вечерва ќе затвори три преговарачки поглавја, а четвртото, за кое земјата беше подготвена, нема да биде затворено поради противењето на Хрватска.
„Тука нема потреба да се зборува за блокада, Хрватска силно ја поддржува Црна Гора сите овие години, од моментот кога ги започна преговорите со ЕУ“, рече Грлиќ Радман, кој учествува на состанокот за надворешни работи на земјите-членки на ЕУ во Брисел.
„Но има одредени прашања кои не се од билатерална природа, туку се хуманитарни и цивилизациски прашања, кои се универзални“, изјави Грлиќ Радман.
Тој посочи дека Хрватска сигурно нема да ги стави билатералните прашања како услов за европскиот пат на Црна Гора, но прашањето за исчезнатите лица за време на Татковинската војна и прашањето за обештетувањето на затворениците се теми кои, како што наведе, мора да нѐ засегаат сите во рамките на Европската Унија, а не само Хрватска.
Црна Гора вечерва ќе затвори три поглавја: Правото на интелектуална сопственост, Информатичко општество и медиуми и Претприемништво и индустриска политика.
За поглавјето Надворешна, безбедносна и одбранбена политика, во која се вклучени и добрососедските односи, Хрватска не даде согласност.
За Црна Гора, затворањето на три поглавја е голем чекор напред, имајќи предвид дека пред тоа го затвори последното поглавје во јуни 2017 година. Вкупно сега ќе има шест затворени поглавја.
Словенечката министерка за надворешни работи Тања Фајон, чија земја со години ја блокираше Хрватска, рече дека билатералните прашања не треба да играат улога во процесот на пристапување.
Одговарајќи на новинарско прашање за одбивањето на Хрватска да се согласи на едно поглавје, Фајон рече дека тоа е билатерално прашање.
„Колку што разбрав, тоа е билатерално прашање, Црна Гора рече дека се обидела да одговори на сите прашања на Хрватска и можам само да кажам дека во секој случај, кога станува збор за проширувањето, билатералните прашања не треба да бидат товар во овој процес“, рече Фајон.
