Обвинителството на Босна и Херцеговина во средата побара Судот на Босна и Херцеговина да го осуди лидерот на босанските Срби Милорад Додик на затворска казна и десетгодишна забрана за вршење политичка функција во таа земја.
Во завршниот збор по доказната постапка која траеше една година, обвинителот Недим Ќосиќ на сослушувањето во средата во Судот на БиХ во Сараево оцени дека наводите во обвинението, кое ги товари Додик и вршителот на должноста директор на „Службен весник на Република Српска“, Милош Лукиќ за непочитување на одлуките на високиот претставник за Босна и Херцеговина, Кристијан Шмит се докажани надвор од сомнеж.
Затоа, тој му предложи на судот да ги прогласи Додик и Лукиќ за виновни и да ги осуди на казни затвор „близу“ до максималната пет години. Тој, исто така, сака судот да изрече дополнителна мерка, забрана на Додик да ја извршува функцијата претседател на РС и забрана за вршење изборна функција во БиХ за дополнителен период од десет години.
Тој предложи Лукиќ да биде сменет од функцијата директор на Службен весник на Република Србија.
Горан Бубиќ, адвокат на претседателот на Република Српска, Милорад Додик, денеска во својот завршен збор изјави дека обидот за криминализирање на Уставот на Република Српска е правно неодржлив и дека одлуката на Судот во оваа постапка не може да биде ништо друго освен ослободителна.
Бубиќ рече дека Обвинителството на БиХ го „распнало“ Додик меѓу Уставот на Република Српска и Кристијан Шмит.
Адвокатот во завршниот збор истакна дека тој го бранел човекот, бидејќи де јуре во овој случај нема кривично дело.
Бубиќ истакна дека советниците на Додик, сведочејќи во Судот на БиХ, посочиле дека Уставот на Република Српска не ја признава можноста претседателот на Републиката да не потпише указ и дека во спротивно тој може да одговара кривично.
„Додик постапи во согласност со Уставот на Република Српска, а со тоа и со Уставот на БиХ, со кој е усогласен“, изјави Бубиќ.
Тој нагласи дека Додик не ја спроведува сопствената политика, туку политиката што ја воспоставува Народното собрание на Република Српска и дека при донесувањето на важни одлуки секогаш се консултирал со советници од неговата околина кои се авторитети во областа на правото.
Тој потсети и на фактот дека Советот за безбедност на ОН не усвои резолуција со која се потврдува Шмит како висок претставник, на што судијата побара да се врати на темата на судењето.
Бубиќ оцени дека во оваа постапка Додик Лукиќ се колатерална штета во борбата меѓу слоновите, односно борба внатре во меѓународната заедница.
Нагласувајќи дека судската постапка ја покренал Шмит, Бубиќ додаде дека неговите изјави испраќаат порака дека пресудата е донесена.
„Изјавите и одлуките на Шмит се незаконски бидејќи тој е неизбран странец кој има намера да елиминира политички противник“, рече Бубиќ, заклучувајќи дека постапката нема никаква врска со владеењето на правото.
Како и на претходните рочишта, Додик пред зградата на Судот на БиХ беше пречекан од бројни поддржувачи со придружна кореографија, транспаренти и скандирања „Миле, Миле“. Во пресрет на рочиштето, пристигнаа нови закани од Република Српска и официјални лица кои најавија радикални одлуки во случај на каква било пресуда за случајот.
