Претседателот на Владата на Република Хрватска, Андреј Пленковиќ, во Бански двори го прими премиерот на Република Грузија, Иракли Гарибашвили, со кого разговараше за билатералните односи и евроатлантскиот пат на Грузија.
„Хрватска и Грузија имаат приближно ист број жители, а Грузија има амбиција да стане членка на ЕУ и НАТО алијансата во која ја има поддршката на Хрватска, изјави Пленковиќ.
Тој потсети дека минатата година Европскиот совет одлучи на Украина и на Молдавија да им даде кандидатски статус, додека Грузија исто така го доби тој статус, но со европска перспектива и обврска да ги исполни 12-те обврски кои се наоѓаат во мислењето на Европската комисија.
„Верувам дека до крајот на годината повторно ќе разговараме за сите три земји и дека Грузија ќе напредува за да може да оди понатаму кон членство во Европската унија во институционална смисла“, рече Пленковиќ.
Политичката и безбедносната ситуација во Грузија е многу чувствителна
Хрватскиот премиер додаде дека грузискиот претставник бил на последниот самит на НАТО во Вилнус и оти Грузија добила порака која се однесува на двата моментално окупирани региони на нејзина територија, Абхазија и Јужна Осетија, кои подоцна Русија дури и формално ги анектираше со своите акти, рече Пленковиќ.
Тој посочи дека се работи за ситуација на замрзнат конфликт, слична на ситуацијата во Крим, Доњецк и Луганск во Украина и Придњестровје во Молдавија.
„Политичката и безбедносната ситуација во Грузија е многу тешка и чувствителна“, рече Пленковиќ и додаде:
„Хрватска ќе продолжи да ја поддржува Грузија во нејзините реформски напори, европските и трансатлантските амбиции.
Ја цениме силната поддршка на Хрватска за нашиот интегритет
Гарибашвили посочи дека Хрватска ја смета за пријателска и партнерска земја и дека за Грузија Хрватска е пример во Југоисточна Европа, имајќи предвид дека за три децении од независноста ги исполни своите главни цели, стана полноправна членка на Европската унија и го заврши интегративниот процес.
Гарибашвили денеска во Пантовчак официјално ќе ја отвори амбасадата на Грузија во Хрватска, што го оцени како можност за зајакнување на билатералните односи меѓу двете земји и зајакнување на присуството на Грузија во овие области.
„Ја цениме силната поддршка на Хрватска за нашиот интегритет, територијалност, нашиот пат кон европската и трансатлантската интеграција“, рече Гарибашвили.
Тој оцени дека во изминатиот период Грузија ги зајакнала својата економија и демократските институции, додавајќи дека визната либерализација и Спогодбата за стабилизација и асоцијација се важни чекори на европскиот пат на Грузија.
„Актуелниот политички контекст покажува колку е важно да се диверзифицираат односите кога станува збор за снабдувањето со енергија и храна“, рече Гарибашвили.
Тој додаде дека Грузија, како црноморска земја и како сигурен партнер на Европската унија игра важна улога во транспортното и инфраструктурното поврзување на регионот, но и дека се подготвени да продолжат со дипломатските напори за решавање на прашањето за 20 отсто од територијата окупирана од Русија.
„Сакаме да ги подобриме нашите економски односи, рече хрватскиот премиер и го поздрави ангажманот на неколку хрватски компании кои работат во Грузија и ги покани грузиските бизнисмени да инвестираат во Хрватска.
Посетата на премиерот на Грузија Гарибашвили е прва посета на грузиски премиер на Хрватска во последните 30 години дипломатски односи меѓу двете земји.
