Емилија Стојменова Дух повеќе не е министерка за дигитална трансформација во Владата на Словенија, а за нејзината оставка е известен и Државниот збор (Парламентот).
Иако во Државниот збор за денес беше најавена втората интерпелација за министерката за дигитална трансформација Емилија Стојменова Дух, пратениците на почетокот на седницата беа само информирани за нејзината оставка што вчера ја прифати премиерот Роберт Голоб.
На дневен ред на седницата на Државниот збор и за денес беше закажана расправа за интерпелација на министерката Емилија Стојменова Дух, која вторпат ја поднесе опозициската СДС. Меѓутоа, бидејќи премиерот Роберт Голоб веќе ја проследи до Државниот збор изјавата за оставката што му ја понуди министерката вчера попладне, пратениците беа запознаени со тоа на почетокот на седницата.
Претседателот на Владата сега треба да назначи нов министер или да го извести Државниот збор дека привремено сам ќе ги извршува должностите на министерката или ќе му ги довери на друг министер во рок од десет дена по престанокот на неговата должност.
Министерката Стојменова Дух му понуди оставка на премиерот по неколкумесечните обвинувања за неправилности при набавката на 13.000 компјутери и за наводите дека сакала да се осигури локалните власти да ја прекинат прекршочната постапка за пребрзо возење на австрискиот автопат.
Стојменова Дух вчера ги нарече невистинити наводите дека се обиделе да избегнат казна за возењето во Австрија бидејќи сѐ уште не ја добиле казната. Таа ги отфрли и критиките за немањето резултати и управувањето со Министерството.
Во изјава за медиумите таа вчера рече дека со мирна совест и крената глава ја прифаќа објективната одговорност и дека на премиерот Роберт Голоб му понудила оставка. Накратко потоа премиерот на социјалната мрежа Х објави дека ја прифатил оставката, а вечерта оставката веќе ја проследи до Државниот збор.
Со оставката на министерката за дигитална трансформација, Владата ќе ја доживее деветтата смена на министер. За повеќе од две години од мандатот, од Владата заминаа министерката за внатрешни работи Татјана Бобнар, министерот за здравство Данијел Бешиќ Лоредан, министерката за земјоделство Ирена Шинко, министерот за заштита на животната средина и простор Урош Брежан, министерката за јавна администрација Сања Ајановиќ Ховник, министерката за правосудство Доминика Шварц Пипан поднесе оставка, а на министерот за одбрана Марјан Шарец му заврши мандатот по изборот за пратеник во Европскиот парламент.
