Во Клиничкиот центар во Подгорица почина Дејан Кокотовиќ, 13. жртва од масакрот во Цетиње што го изврши Ацо Мартиновиќ.
Кокотовиќ бил ранет во стомакот, градите и главата во нападот на Мартиновиќ во кафулето „Велестово“ на 1 јануари, каде што убиецот го почна крвавиот пир.
Кокотовиќ истата вечер бил опериран во Клиничкиот центар во Подгорица.
Уште три лица кои се повредени во трагедијата се на лекување.
Уште не се познати мотивите за крвавиот масакр во Цетиње во кој Мартиновиќ (45), убил 12 лица, меѓу кои две деца на возраст од 10 и 13 години, како и две жени, меѓу кои и неговата родена сестра. По убиството, откако бил опкружен од полицијата, Мартиновиќ изврши самоубиство.
И останатите жртви биле роднини и пријатели на убиецот, за кого полицијата тврди дека претходно барала да му биде извршен психијатриски преглед, откако кај него дома во 2022 година било пронајдено оружје и експлозивна направа.
На Мартиновиќ тогаш му била препишана терапија во Здравствен дом, но не бил упатен во специјализирана здравствена установа.
