Проширувањето на Европската унија за девет нови земји, вклучително и Украина, би ги чинело постоечките членки повеќе од 256 милијарди евра, пишува Гардијан.
Според Гардијан, крајниот ефект би бил многу земји кои моментално уживаат нето финансиски придобивки од ЕУ да се претворат во нето-придонесувачи.
„Сите земји-членки ќе треба да плаќаат повеќе, а да добиваат помалку од буџетот на ЕУ, а многу земји членки кои во моментов се нето-приматели ќе станат нето-придонесувачи“, се наведува во писмото од секретаријатот на Советот на ЕУ, до кој имала увид редакцијата на „Фајненшл тајмс“.
Украина, убедливо најголемата од деветте земји прифатени како потенцијални кандидати, ќе има право на 186 милијарди евра во текот на седум години, покрај трошоците за реконструкција на Украина, кои Светската банка оваа година ги процени на околу 400 милијарди евра, пишува Гардијан.
Проширувањето стана една од најитните теми за ЕУ, а лидерите се состанаа минатиот петок за да разговараат за тоа како да се насочи дебатата за клучните прашања, вклучувајќи го буџетот, бројот на места во Европскиот парламент и дали проширениот блок би можел да продолжи да гласа едногласно во одредени области.
Висок дипломат изјави за Гардијан дека се очекува буџетот да биде единственото најспорно прашање и дека треба да се реши до 2027 година, кога ќе започне следниот финансиски циклус, за да може ЕУ да покаже дека е подготвена и со тоа да го отстрани секој изговор да се одложат понатамошните дискусии за тоа дали и колку брзо Украина, Молдавија и земјите од Западен Балкан би можеле да се приклучат.
Во објавениот документ се проценува дека буџетот би се зголемил за 21 отсто на 1,47 милијарди евра доколку се приклучат сите девет земји. Ова би значело значително зголемување на придонесите од Германија, Франција и Холандија, со преодни периоди неопходни за зголемено финансирање.
Износот потрошен за земјоделството, исто така, ќе се промени, при што Украина има право на 95 милијарди евра во текот на седум години, што е уште еден трошок што земјите-членки ќе треба да го земат во предвид.
Друг клучен фонд, познат како кохезионен фонд, кој обезбедува пари за инфраструктура во помалку развиените земји, исто така би бил значително погоден од проширувањето.
Според сегашната финансиска формула, Чешка, Естонија, Словенија, Грчка администрација Јужен Кипар Малта и Литванија повеќе не би биле подобни за добивање средства.
