Владимир и Миљана Кецмановиќ, мајката и таткото на Коста, кој на 3 мај лани уби девет деца и училишниот чувар во ОУ „Владислав Рибникар“, денеска на судењето во Вишиот суд во Белград ја негирале вината.
Како што јавуваат медиумите, судскиот совет го усвои предлогот на Вишото јавно обвинителство за исклучување на јавноста од судењето за да се заштитат правата и интересите на сите малолетни жртви во оваа постапка. На барањето се жалеле адвокатите на обвинетите, но судот ја исклучил јавноста до крајот на процесот.
Адвокатот Боривое Боровиќ посочи дека нема законска причина да се исклучи јавноста и да се затвори судењето, бидејќи Обвинителството без причина предложило малолетните деца од класот на Коста да бидат сослушани во судница. Како што рече, одбраната нема прашања за нив, а нивните изјави може да се прочитаат, за децата дополнително да не се трауматизираат.
„Јавноста мора да биде информирана за се што се случува во овој процес и медиумите ќе пишуваат и известуваат за тоа, без разлика дали се во судница или не“, изјави Боровиќ.
Владимир Кецмановиќ на судењето е донесен од притвор, а неговата сопруга Миљана е на слобода. Пред почетокот на судењето, кога Владимир беше донесен во судница, Миљана се расплака, а исто така и кога тој седна на обвинителна клупа. Кецмановиќ во судницата неколку пати ги бришеше солзите.
Зад него во судницата седеа дел од родителите на убиените деца, но немаше дофрлање и сѐ помина мирно. Кога судијата нареди пауза, на Владимир Кецмановиќ му беше дозволено да ја прегрне сопругата. Таа го прегрна и повторно заплака.
Како што изјавија адвокатите пред судот, на денешното рочиште беше прочитано обвинението, а потоа се одржаа воведните зборови на одбраната и на обвинителството.
Обвинетите ги негирале сите точки на обвинението, а на утрешното судење детално ќе ја изнесат одбраната.
Освен сопружниците Кецмановиќ, обвинети се и сопственикот на стрелачкиот клуб во кој се сомнева дека момчето научило да пука, Ратко И. и инструкторот во тој клуб Немања М..
Во обвинението е предложено судот да го осуди Владимир Кечмановиќ на затворска казна од 12 години, Миљана Кецмановиќ на затворска казна од две и пол години, додека за Ратко И. и Немања М. е предложено по три години затвор.
Владимир Кецмановиќ се товари за кривично дело тешки дела против општата безбедност бидејќи го обучувал својот 13-годишен син да ракува со огнено оружје, го однел на стрелиштето и затоа што тој не го чувал оружјето безбедно, како што е предвидено со закон.
Вишото јавно обвинителство ја товари мајката на момчето за кривично дело недозволено изработување, држење и држење оружје и распрскувачки материјали, бидејќи нејзини отпечатоци имало на една од чаурите пронајдени по масакрот во „Рибникар“.
Ратко И. и Немања М. Се товарат за кривичното дело давање лажна изјава.
Против таткото и мајката се водат и две правни постапки по тужби од членови на семејствата на убиените за надомест на нематеријална штета поради смрт на блиско лице.
