Достапните статистички податоци покажуваат дека секој македонски жител на годишно ниво генерира над 300 киломграми отпад. Во 2023 година во земјава биле произведени 350.833 тони комунален отпад, што е околу 460.710 кубни метри.
На целата територија на земјава постојат над 2 илјади диви и 54 нестандардни депонии, покажуваат проценките на Националниот план за управување со отпадот.
Единствената депонија која ги исполнува стандардите според Националната стратегија за управување со отпад (2020-2030) е „Дрисла“, која му служи на Скопскиот регион.
Граѓанските организации предупредуваат дека доцнат проектите и дека државата треба активно да инвестира за да ја добие довербата на граѓаните.
Од Министерството за животна средина најавија дека изградбата на регионалната депонија во Свети Николе ќе започне кон крајот на 2025 година. Рокот за проектот за Свети Николе, кој е финансиран од фондовите на ЕУ, е 2026 година и доколку не се спроведе навреме, финансирањето од ЕУ ќе биде одземено.
