Словенија донесе одлука за продолжување на граничните контроли со Хрватска и Унгарија.
Словенија на тој начин ја продолжува граничната контрола, а одлуката за тоа првпат беше донесена на 21 октомври минатата година. Контролата на внатрешната Шенген граница со Хрватска и Унгарија, која во моментов важи до 21 декември, ќе биде продолжена за уште шест месеци.
Како што е објаснето, Владата на Словенија одлучила да го продолжи надзорот поради зголеменото ниво на закана од тероризам.
„Полицијата ќе продолжи да ги следи граничните премини со Хрватска и Унгарија на начин што ќе има што помало влијание врз протокот на патници, животната средина и економијата, а особено врз животот на населението долж границата. “, соопштија од владината канцеларија за комуникации.
Станува збор за привремена мерка поради зголемената закана од тероризам, со која Владата на Словенија сака да обезбеди високо ниво на безбедност за сите жители, додаваат по седницата на Владата.
Поради влошувањето на безбедносната состојба на Блискиот исток и зголемената закана од тероризам, Словенија на 21 октомври минатата година воведе надзор на границата со Хрватска и Унгарија. Потоа, од истите причини, Италија воведе надзор на границата со Словенија и оттогаш го продолжува, исто како Словенија.
Во средата Италија ја објави одлуката за продолжување до јуни 2025 година. Австрија минатата недела ја продолжи и граничната контрола со Словенија за половина година, до 11 мај 2025 година. Австрија ја воведе оваа мерка во екот на бегалската криза во 2015 година.
Инаку, контрола на внатрешните граници спроведуваат и Германија, Данска, Франција, Италија, Норвешка и Шведска, додека Холандија на 9 декември ќе воведе гранична контрола со Белгија и Германија.
Во согласност со член 27 од Шенгенскиот граничен кодекс, Владата на Словенија ќе ги информира другите членки на Европската унија, Европската комисија и Европскиот парламент за планираното воведување на привремена повторна контрола.
