Снегот што продолжува да паѓа предизвика големи проблеми, особено во сообраќајот, во Србија и Хрватска.
Во неколку области на запад и југ од Србија до среда се очекуваат нови 20 до 40 сантиметри снег, а во планинските области и до 50 сантиметри, соопшти Републичкиот хидрометеоролошки завод (РХМЗ) на Србија.
Според прогнозите, снежната покривка ќе се згусне и во Белград за десет до 15 сантиметри, каде има проблеми во сообраќајот. Снег ќе паѓа главно во западниот дел на Србија каде е на сила црвено предупредување.
Невремето во последните два дена предизвикува големи главоболки на подрачјето на Далмација во Хрватска. Пожарникарите во Сплит отстранија неколку паднати дрвја и улични светилки кои оштетија паркирани возила.
Проблеми поради ветрот има и во другите делови на јадранското крајбрежје, а поради силниот ветер пожарникарите неколкупати мораа да интервенираат и во Загреб.
Ветерот на некои места во Далмација достигна брзина од 120 километри на час, поради што се уште се во прекин бројните фериботски врски.
Поради ветер и наноси од снег затворен е и делот од автопатот А1 што го поврзува Загреб со Далмација.
Метеоролозите предупредуваат дека невремето ќе продолжи и денеска, што значи дека постои можност снегулките со помош на ветерот да стигнат до крајбрежните области.
