Еден граничен полицаец на српското МВР е убиен, а друг ранет во четвртокот вечерта при рутинска контрола кај Лозница кога биле застрелани од косовски Албанец по кого се врши интензивна потрага, потврди во четвртокот министерот за внатрешни работи Ивица Дачиќ.
Нападот се случил 55 минути по полноќ кога полицијата на контролниот пункт во Липнички Шор кај Лозница запрела „мерцедес“ со регистерски таблички од Тутина на југот на Србија, во кој имало две лица.
Излегувајќи од возилото, мажот од кого било побарано да покаже што има во чантата, пукал со пиштол, застрелувајќи го 34-годишниот полицаец во градите и неговиот 50-годишен колега во рамото, по што побегнал.
Полицајците биле пренесени во Општата болница Лозница, каде помладиот полицаец починал.
Вториот полицаец со прострелни рани во грбот и рамото е задржан во болница и е во стабилна состојба, потврдија лекарите за Српската радио телевизија.
На местото на нападот полицијата нашла пасош на осомничениот издаден од косовските власти на име Хајзири Артан (33) и лична карта издадена во Германија.
Започната е интензивна потрага во која учествуваат полициските служби во Шабац, одделенијата за криминалистичка и гранична полиција и припадници на Специјалната антитерористичка единица, а подигнати се и беспилотни летала и хеликоптери, потврди министерот Дачиќ.
Според пишувањата на белградските медиуми, вториот човек од запрениот автомобил е уапсен, но неговиот идентитет се уште не е познат.
