Членот на Претседателството на Босна и Херцеговина, Денис Беќировиќ, денеска во рамките на Минхенската безбедносна конференција разговараше со претседателката на Косово, Вјоса Османи.
Беќировиќ во разговорот посочи дека Босна и Херцеговина останува посветена на зајакнувањето на политичкиот дијалог, добрососедството, мирот и стабилноста во регионот и дека еден од приоритетите на надворешната политика на БиХ е регионалната соработка.
Беше истакнато дека има простор за унапредување на економската соработка, и дека е неопходно да се поедностават процедурите за слободен проток на луѓе, стоки, услуги и капитал. Во таа смисла, беше изразено очекување Босна и Херцеговина да ја продолжи процедурата за ратификација на Договорот за слобода на движење со лични карти во Западен Балкан.
Беше истакната важноста на одлуката на Косово еднострано да овозможи слободно движење со лични карти на граѓаните на Босна и Херцеговина од 1 јануари 2025 година.
Беќировиќ изрази жалење што граѓаните на Косово се уште немаат можност за слободен влез во Босна и Херцеговина. Тој нагласи дека ова е резултат на неразумните блокади од босанско-херцеговскиот ентитет Република Српска, што исто така претставува кршење на потпишаните договори од Берлинскиот договор. Во таа насока, беше истакнато дека Србија, Албанија, Црна Гора и Северна Македонија ги ратификувале сите договори за либерализација на движењето во регионот.
Соговорниците констатираа дека соработката во рамките на Берлинскиот процес резултирала со бројни проекти кои имаат благотворно влијание врз економијата и секојдневниот живот на бројни граѓани во регионот. Изразена е заложба за зајакнување на соработката во сите сегменти во наредниот период, со цел да се олесни животот на граѓаните на Босна и Херцеговина и на Косово.
Османи на официјалниот профил на X објави за средбата со Беќировиќ, наведувајќи дека разговарале за регионалната безбедност и важноста од блиска координација за подобрување на евроатлантската иднина на двете земји.
“Посилната соработка е клучна за трајна стабилност и напредок“, објави Османи.
