Советот за надворешни работи на Европската унија во понеделник ќе одржи состанок предводен од високиот претставник за надворешна политика и безбедност на ЕУ, Жозеп Борел, соопштија од Советот на ЕУ.
На 13 ноември министрите за надворешни работи на ЕУ се очекува да разговараат за војната во Украина и за последните случувања во Ерменија и Азербејџан.
По Советот за надворешни работи, министрите на ЕУ ќе учествуваат на министерскиот состанок меѓу ЕУ и Западен Балкан.
Министрите за надворешни работи на Западен Балкан, вклучително и Косово, заедно со министрите за надворешни работи на ЕУ, според агендата, ќе се сретнат во 17:30 часот, а средбата ќе ја води шефот на дипломатијата на ЕУ, Борел.
Европската комисија во средата одобри голем пакет финансиска помош за Западен Балкан, инаку познат како „План за раст“, од шест милијарди евра за периодот од 2024 до 2027 година.
Планирано е до две милијарди евра од оваа сума да одат како грантови, а четири милијарди во форма на поволни заеми или капитални инвестиции.
